Scho fasch wieder z Brisbane

Sodeli ich darf wieder emal dra glöibi und mieni koschtbar Ziet ver dische Text investiere. Während z Kegi schich scho schön igekuschlet het, bin ich fliessig am Text schriebe. Aber äs isch ja öi eine vane letschte Texta va miener Sieta üs Australie, sodass ich das gäre uf mich nime.
Also so Grossstädt sind scho nu so schön und so, aber sind wirkli nit eso mieni Sach und ich würdi hie glöibi nit alte wärde. Gopf, wemu hie mit eme Auto in eso en Millione Stadt geit brüchts entweder vil Geduld oder mu müess eifach stiechfräch si und äs git Liet wa das täglich uf schich nähment, gängimer gar nit. Da wier beides nit wirkli hei oder si, siwer de öi fasch vergaggret. Ich hä nur scho mieh weni durch Visp fahre und riese Stau isch, vergiss wenn ufera 5-spurigi Strass Richtig City Stau isch und mu nit genau weiss wos durch geit. Ja wier heis scho schön im Wallis.
Aber äbe, wier hei öi nu schöni Sache erläbt siet dum letschte Mal.

Nah dem wer z Batemans Bay im Internet sii gsi, siiwer nu churz bits ga shoppe. Wier entwickle nisch hie z Australie zu regelrächte Shoppingtante, aber hie hensch eso vil hibs Gwand. Ja der Gäldsack isch scho scheh am liede. Gad wiet siiwer de an dem Tag öi nime cho und hei nisch bim Burril Lake es hibs Platzji gsüecht zum ubernachte. Bime flotte Park, iner Nechi vame Campingplatz, siiwer de fündig worde. Dawer scho 1-2 Täg ischi Körperpfleg benachteiligt hei, heiwer nisch churzerhand nachera professionelle Erkundig bim Camping igschliche und hei nisch da e flotti warmi Dusch gegönnt. Gad ganz gratis isch de das öi nit gsi, pro 5 Minüte warems Wasser het me es 20-gi miesse ikie. Nach der glungene Mission ohni Verlust heiwer nisch d räschtlich Pizza gegönnt und nach es paar Pierlini siiwer de öi scho nit z spat ga ligge.

Am Mäntag heiwer zersch mal bits lenger gschlafe und nach der Asträngig heiwer es liechts Hungerli verspirt. Da mu schich susch öi nix gönnt, siiwer ins Konsum und hei nisch da es paar Eier geposchtet. Mit der neu Pfanna wawer köift hei het das wunderbari Spiegeleier gigä, chas gar nit verstah wieso dass das mier friener nie zum Frühstuck gigä het. So es richtigs geils Oz-Frühstuck mit Späck und Eier isch doch z beschta um e Tag azfah.
Bevor wer nisch ufe wieter Wäg hei gmacht, heiwer iischers füessballerisch Talent wieder emal zum vorschii gebrunge, hei dii Pirschtlini chänent jongliere. Emel meh oder weniger, het jedefalls güet geta schich emal wieder e bits z motte. Bim Burril Lake is de öi wieder emal eso wiet gsi um churzi Hose und Flip-Flops z montiere, hei das isch schön gsi mal wieder e bits wermi.
In Ulladulla, wettigi Näme ver Ortjini heint dii hie das glöibsch gar nit, heiwer d z Chind in iisch wieder emal üsagla, sii eso ime Funland gsi mit jene Spielautomate. Da hets va Air Hockey bis zu Motor Race alle Scheiss kä, z Zähnerli wawer da verspielt hei isch de dementsprechend öi schnäll ewäg gsi. Das isch de aber öi nit z einzig Zähnerli va dem Tag gsi wawer sinnlos hei üsgigä. Nah dem wer wieter uf Jervis Bay sii gange heinsch da Itritt welle ver de National Park, ich säge dier d Australier mächent Gäld wasch öi nur chänent. Da is de öi eso schön und einzig artig gsi, dasswer nachera halb Stund wieder wieter Richtig Norwa si. Obwohl ich der Aldi bi iisch nit unerstütze findis hie z Australie e super Sach, sodass wer de z Norwa öi gad schnäll sii ga verbie lüege. Wier hei zwar eigentli nix gebrücht, sii de aber gli mit volle Säck üsem Gschäft cho, da gits eso billigs Bier gägenüber dum andre, isch e wahri Freid. Per Züefall siiwer de ufer Wältberühmt Grand Pacific Road wieter gfahre. Gad wiet siiwer de an dem Tag nime cho und hei nisch z Shoalhaven Heads niedergelassen. Nach feine Tortellini mit de Schinke und de ohni Rahm siiwer nach es paar Pier nit z spat ga ligge. Ah z Kegi het nu näbebii z Hotel in d Ordnig gita, wawer de z Sydney hei därfe sii.
Z negscht Interessanter Ortji ufer Grand Pacific Road isch de Kiama gsi, mit schienem Blowhole wa bis zu 20 Meter hochs Wasser cha üsaspritze. Das siiwer de hurtig ga alüege und nach der astrengend Aktivität heiwer nisch mal wieder paar feini Eier zum Früehstuck gegönnt. Nah dem wer de nu vame friendliche Australier agequatscht si worde, di wellent nu vil so wisse wo me eso am umcha reise sii etc., siiwer de öi scho zum negschte Ort, names Wollongong. Das isch di dritt gregscht Stadt va New South Wales und wahrschinli öi eini vane Leidere. Nach dem wer vergebens e halb Stund nacheme Parkplatz hei gsüecht hets nisch de langsam agschisse und sii de halt eifach wieter gange. Z Stanwell Park heiwer de ischi negscht Nacht verbrunge. Bevor wer aber sii ga ligge, siiwer zersch nu uf eso en Lookout gange und derna heiwer nu ins Stadtzentrum welle, wawer de aber leider nit gfunde hei, will das Ort eso chli isch gsi und wahrschinli öi gar keis het kä.
Am Mittwoch heiwer ufum Wäg zum Olympic Park zersch nu der Royal National Park durchquert, ver der hängimu apa öi wieder es Zähnerli miesse bläche, aber wier sii eifach durchgeblocht. Und de het z Ghetto scho wieder agfange. Küm siiwer iner Nechi va Sydney gsi hets uf z mal wieder jeni Auto ufe Strasse kä und di Australier sind wahrschinli nu schlimmeri Autofahrer wa di Tschingini. Ich hämi es paar Mal üfgregt, aber hie müess mu eifach passiv fahre und hoffe dass mu richtig igspurt het, wa mit 5 Spure nit immer gad sicher isch, und susch fahrsch de halt susch eswa durch. Nach vil hin und her siiwer de emel bine Stadie acho und sii öi gad rächtziitig acho um es paar alti bekannti azträffe. Zersch häni va wietem es paar blödi Touriste bim Fötele beobachtet und churz druf het schi herüsgstellt, dass das der Simon und d Sabine vam Töichkurs sind. Hei dii Wält isch eso chlii. De siiwer de öi gad zäme eppis feins ga ässe, billige Hot-Dog, und hei nu zäme en Besichtigungstour vam Höiptstadion va der Olympiade gmacht. Isch nu zimli es grosses Stadion wasch aber ine letschte Jahre bits umgebaut heint und zume Multifunktionale Stadion gmacht, jetzt chänensch AFL, Rugby, Füessball etc. dri spiele. Schii sind de nacher wieter uf Sydney und wier hei nisch ufe Wäg zum DFO(Direct Factory Outlet) Shop gmacht. Da der Wäg nit eiditig agschriebe isch gsi heiwer sus zersch nit gfunde und wower eigentli wieter hei welle is uf z mal vor iischer Nasa gsi. Mit liechterum Portemonnaie siiwer nach Parklea gange wowernisch bime 4 Stäre Caravan Park mit Spa en Nacht gegönnt hei. Nacheme Whirl Pool Gang und era warme Dusch hei wer nu bits d Olympiade im Fern verfolgt und sii nit z spat nieder.
Nachere chalte Nacht is de am negschte Morge wieter Richtig Sydney gange und z Ghetto isch ja scho vorprogrammiert gsi. Vil Auto, beschissni Einbahnstrasse und schlächti Beschildrig hent derzüe gfiehrt, dasswer apa 4 Stunde im Gagga si umcha gfahre ver nix. Güet z YHA(Jugendherberga) isch öi nit unschuldig. Wier sii biner YHA ga ichecke und de hent nisch dii gseit wier chäne bi irum Parkplatz parkiere. Wäri ja güet und rächt, aber der Parkplatz va ine isch eso chlei gsi, dass wahrschinli nit emal en MINI hängisch chäne parkiere. De heiwer halt en andre Parkplatz miesse finde, schi hent nisch de eine vorgschlage was de leider gar nit gigä het. Aber selbst ist der Mann und so heiwer de öi eine gfunde, het zwar 25 Dollar pro Tag koschtet aber was willt. Nach der Action siiwers an dem Tag gmietli agange und sii bits durch z Städtli gluffe, bits ga shoppe, schnäll biner opera verbi und nu schnäll durch de Botanisch Garte. Iner YHA bini de zur Entspannig schnäll in d Sauna ghüppft und nachera warme Dusch heiwer nisch mit der Sabine und dum Simon zum Nachtässe verabredet kä. Wier hei de öi fein bime Italiener dinniert und si derna e Sprung ine Sportbar bi Kings Cross gange. Nach es paar Pierlini und Fröhlichkeit siiwer nu schnäll ines paar Nightclubs. Äs isch de jedefall es bits später worde und biswer im näscht sii gsi isch güet emal halbi 6i gsi.
Voller Vorfreid uf z Hotel und mit schwärem Chopf heiwer am Frietag biner YHA üsgecheckt und nisch derna ufe Wäg zum Swissotel gmacht. Bevor wer da sii ga ichecke, siiwer nu e Sprung ine 3-stöckig Apple Shop, da hängis alles kä was das Herz begehrt. Nachem erfolgriech ichecke siiwer wie chliini Chinder uf z Zimmer und hei da alles erkundet, hei eso es Hotelzimmer mit 2 Doppelnäschti isch scho gad e krasse Unerschied zu ieschum Van. Es tröimli!!! Der Tag siiwer de öi gar nime üsgrickt. Hei am Nahmittag bits der Pool und d Saunas gegnosse und wo am 5-i di Glogga vam Zimmer glietut het, siiwer öi uberraschti gsi. Heint nisch doch nit 2 Agstellti 4 chalti Pier und e flotti Chäsplatta mit emu Chartji derzüe uf z Zimmer gebrunge. En Tröim. Ufum Chartji hent nisch de der Manager und der Chef va der Verpflegig en schöne Üfenthalt gwünscht, als wäriwer irgend riese prominänti Gäscht. Nach dem chliene Zwipf sind de nu d Sabine und der Simon z Bsüech cho und wier hei schi de öi bits jalüsi gmacht mit iischem Hotelüfenthalt. :) Da wer scho mal ime Schwiizer Hotel sii gsi heiwer nisch de da es flotts Chäsfondue gegönnt. Also z Feeling va deheime isch scho es bits üfcho aber das sind ja Wälte. Wier sii nisch glöibi eifach vil z güet gegwännt, will z Fondue isch scho nit so schlächt gsi, aber isch zimli wässrig gsi und Chäs isch öi nit wirkli vil dri gsi. Nach der Erniechtrig heiwer der räschtlich Abe d Olympiade vam Näscht üs bits verfolgt.
Der Samstag isch de ganz uner dum Motto Touriste da sii gstande. Nacheme Hammer Früehstuck, also wirkli Wältklasse mit Späck, Eier, Zopf, Nutella, frische Fricht, Wirscht, Omlette, Gipfeli etc. isch de ischi erscht Station bim IMAX gsi. Da siiwer en 3 D Film namens Wild Ocean ga lüege, isch nu imposant gsi. Der nah siiwer durch Darling Harbour, wunderschöne Ort, gluffe bis zum Aquarium, wower de jeni verschiedenschti Fischa hei gseh. Dadruf siiwer zum Paddys Markt gange wower de öi gad es paar Souvenirs geposchtet hei. Da wier zimli Fühli si heiwer der ganz Wäg derzwische immer mit der Metro, isch eso en Monorail, zruggleit. Nach der asträngend Sach siiwer zrug zum Hotel und heinisch im Spa Beriech entspannt. Flott gstriegluti siiwer bim Sunnerunergang uber d Harbor Bridge gluffe und sii e sprung durch de Luna Park gluffe. Nach jene Foto wawer gmacht hei isch d vorletscht Station der Sydney Tower gsi wamu e wunderbari Üssicht uf Sydney het kä. In dem Ticket isch de öi nu der Oz-Treck ibegriffe gsi wasch ganz Australia mit es paar Animatione vorgstellt hent. Da wier z meischta scho gseh hei isch de das nix nöis gsi ver iisch. Derna heiwer eigentli nu in Chinatown welle ga z Nachtässe aber wills eso beschisse isch gsi heiwer nisch en Dönner gegönnt. Bevor wer nieder sii heiwer nisch nu mit de nöischte Infos va Bejing versorgt.
Am Sunntag heiwer de leider öi scho z Hotel nacheme wiederum super Früehstuck miesse verlah. Z Sydney sälber siiwer de nu schnäll ga „The forbidden Kingdom“ im Kino ga lüege und derna nu schnäll ane Bondi Beach. Isch der negscht schön Strand bi Sydney aber mit jene Touris. Bis wer de mal bits üsserhalb sii gsi is de öi fasch wieder dunkel worde und de heiwer nisch hankerum entschiede wieder nach Parklea zum Caravan Park z ga und da nu es letschts mal en Whirl Pool gniesse. Ufum Wäg heiwer nisch de nu bits Verfahre aber schlussendli heiwers de doch nu gfunde. Also isch scho nu e chliene Unerschied vam Doppelnäscht zu iischem Van gsi, wier wäri gäre nu im Hotl gsi.
Nachera chalte Nacht siiwer de wieter ini Blue Mountains gfahre und hei da di berühmte 3 Schwöschtre bestühnt. Also ich hä scho gmeint wier heige beschissni Näme ver d Maskotchen va der Euro üsgwählt aber wie di dri heissent isch nit gad vil besser. Nämli Tixe, Taxe und Buxe!
Nah dem wer wieder emal Bärga hei gseh heiwer so schnäll wie megli ani Küschta welle um mal wieder bits wermer z hä. Non-stop siiwer de wieter nach Swansea wawer nisch siet langem emal wieder en feine Tuggel Fleisch gegönnt hei.
Geschter siiwer wieter nach Newcastle, also nix hibs, wower nisch en chliene Imbiss bim Subway spendiert hei. Dii Industriestadt het nisch nit eso gfalle und so siiwer wieter nach Stockton wawer de ohni sus z erwarte Wahla gseh hei, wunderschön. Summi Liet sind da stundelang da gsi, aber wier heisus nach es paar Minüte scho gseh kä und der negscht Stopp isch de öi scho Nelson Bay gsi, immer Summer wäri das es Tröimli zum Bade und Chille, aber das nit eso warm isch gsi siiwer churz ga shoppe und de öi scho wieder wieter. Z Nelson Bay hängis nu en Rodlbahn kä, isch aber leider züe gsi. Ubernachtet heiwer de ufera Rest Area iner nechi va Bulahdelah.
Hitu heiwer eigentli nit gad vil gleischtet, hei nisch mal wieder bits en lengere Schlaf gegönnt und sii derna bis uf Forster geblochet wower jetzt öi sii. Hie siiwer schnäll uf en schöne Lookout gluffe womu dii ganz Küschta gseht und derna siiwer im Aldi ga Verpflegig poschte ver d negschte paar Täg oder Wuche. Ja und jetzt hän ich öi fertig. Gratuliere das bis hie bisch cho mim läse, isch halt wieder emal e lengere Text worde alsi eigentli vor hä kä. In ewiger Liebe und hoffentli z letschtesch mal, ewe Benjamin.