Bäck iner Zivilisation

Im Outback gits ja scho gspässigi Sache. Wier heinisch mal genauer informiert wie schich di güete Australier öi tiehnt wieterbilde, anstatt irgend eswo jeni Kilometer ewäg va deheime in d Schüel z ga, chänensch gmietli der Radio astelle und derglieche tüe als würdisch eppis lehre. Weiss nit, aber Schüel uber Radio gängimer gar nit, de chasch ja nit emal ine Prüfige bschiesse. Uf wasch öi rächt stolz sind isch der Flying Doctor, da findusch fasch in jedem Ortji es Museum. Hei nisch de aber nit chäne uberwinde Gäld ver das üszgä. Was öi nu rächt komisch isch gsi sind mitsch in irgend emu Kaff eso Hot Springs. Wier hei de zersch nu dri welle ga bade, aber nah dem dasswer gmerkt hei dasch arsch heiss sind, heiwersus de lieber la si. Bevor wer ins Outback sii gfahre heiwer nisch zersch nu e Siessigkeit gegönnt. Iisch het en Australier agigä mu selle unbedingt emal binera Zuckerrohrplantage ahalte, so es Zuckerrohr abbräche und derna gniesse. Isch gar nit eso schlächt gsi.Aber äbe nah dene ganze Kuriositäte is de bi iisch am Ziischtag wietergange. Isch der letscht Tag mim Dietsche gsi, wier hei gegnosse. Am morge heiwer iische Wicked Camper zum Service miesse bringe, das isch eso en obligatorischi Sach wemu durch z Outback fahrt. Das isch de zum Glück öi nit eso lang gange. Der Mechaniker het nisch de öi nu agigä wier selle im Umfäld va Alice Springs z tierer Benzin Premium Unleaded tanke will anschienend d Aborigines afänge z billigera z schnüffle. Ja klar. Mit nöiem Motorel und weiss nit wasch susch nu gmacht heint, siiwer de zer negsch Tankstell gfahre und hei getankt. Natirli heiwer z billigera getankt, mu müess dii arme Aborigines öi bits unerstütze. Der Tagdurch siiwer de nu bits iner Mall va Alice ga shoppe und hei sogar es rächts Schnäpchen gmacht, hei 7 CD’s ver 35 Dollar geposchtet. Aber dementsprechend isch öi d müsig, ei CD isch scho im Chüder glandet und vane andre losewer apa gad eini. Nacheme deliziöse Nachtässe vam Red Rooster siiwer mal wieder eine ga billiarde. Der Abe heiwer de mit eme gmietliche Kinogang la üsklinge, sii The Love Guru ga lüege, isch nu witzig gsi. Nichtsahnend heiwer nisch güetglühnt ufe Wäg zum Van gmacht um ga z ligge. Aber de siiwer knapp dum Tod entrunge, hei dii pirschtlini heint Schwein kä. Ich hä ja scho bits Vorurteil gägenüber de Aborigines kä, willsch halt äbe scho zum Teil rächti Fracks sind, aber nach dem Erläbnis häni endgültig gnüeg va dene. Hent nisch doch nit 2 chleini Abos, seiti nit uber 12 jährig, wa appa bits z vil Benzin gschnüfflet hent, mit dem Tod gedroht wewer ne nit eppis z röike gäbe. Wier hei scho va era ander Schwiizeri mitvercho dass Alice rächt kriminell siege, dera heinsch z ganz Gwand wasch zum trochne üsgheicht het kä geklaut. Aber gad eso. Nach der Attacka heiwer nisch de mim Van bits va Alice entfährnt um e bits imere sichere Umfäld z ubernachte. Nacheme churze Zwischestopp bim Flughafe siiwer bim Museum fündig worde und hei de da e rüehigi Nacht chäne verbringe.Nach dem wer de Jeffrey am Mittwoch morge bim Flughafe üsagschosse hei siiwer de endli wieder emal siet langem eleinzig unerwägs. Ufem Wäg zu iischem negschte Ziel Coober Pedy heiwer alli CDs im schnälldurchgang durchglost und da het schi eigentli nur d Reggaemüsig als wares Schnäppchen herüsgstellt. Uf z Malsch het schi de öi iischi kaputtig Box mit der schwungvoll Müsig derzüe entschiede wieder z funktioniere. Unmittelbar nach dem wer im nöie Staat South Australia sii igfahre gsi heiwer nisch va iischem mitgebrunge Gmiess und Obscht verabschiedet. Hie z Australie darfsch kei Fricht und Gmiess uber di Gränze mit nä willsch eswas Problem mit Frucht Fleige hent, kei ahnig was genau z Problem isch. Aber hie tiehnsch nu gäre hochi Büesse verteile, bis zu 2500 Dollar, und wier mit ieschum Glick heisus nit welle herüsfordre. Nach dem chleine Zwischestopp siiwer de wieter Richtig Coober Pedy, z einziga wawer uf dem eitönige Wäg gseh hei sind es paar wildi Hind gsi. Z Coober Pedy sälbsch siiwer de es paar Gebäude und Chirche ga alüege, isch nu rächt cool, da sind rächt vil Gebäude unerirdisch ine Mine gebuwt. Iner Stadt findsch öi uberall Opal zum chöife, willsch aber tüsigi Opal Mine in der Gägend heint. Wier wa z Gäld hängi hei nisch de aber gli keine köift. In der Stadt hets öi nu es paar rächt fründlichi Abos kä.  Schii hent apa wieder mal bits z vil gschnüfflet kä und heint sogar mit Stinkefinger um schich gschosse, aber äbe sind ja nit alli eso. Nach dem agnähme Erläbnis siiwer de nu es paar Kilometer wietergfahre und hei de ischers Lager kei ahnig wo üfgschlage. Das isch d erscht Nacht gsi was eso richtig Chalt isch worde und wer gmerkt hei, dasch hie z Australia wirkli öi chalter Winter heint.Am Donnschtag heiwer de eigentli nit vil gmacht üsser es paar Kilometer kleppft um wieder bits ine Zivilisation z cho. Ufum Wäg siiwer mal schnäll 5 Minüte z Woomera gsi, was emal e Raketeabschussbasis het kä, aber susch öi nix. D erscht Zivilisation heiwer de wieder z Port Augusta gseh wawer de schnäll es paar Sache sii ga ichöife, uneranderum mal wieder bits Alkohol. Äh mal eso e 4 Lieter Wiikarto müess mu schi fasch gönne. Wenn dass ischii Urgrossväter gsängi wasch hie ver Fussel an Wii verchöifent. Gschlafe heiwer de dii Nacht zwische Orroro und Peterborough, gopf äs wird immer wie friehner chelter und chelter.D negscht Destination isch Burra gsi, da gsehts üs wie bi isch im Flachland sind eifach 50 Jahr hinina dri. Uberall want glüegt hesch nur Schaf, Pürlini und jeni Ruine. Wier als Wii Gniesser sind de wieter ins Barrossa Valley wasch anschienend rächt güete Wii produzierend, heinu de aber nit sälber degustiert wills 1. z tier und 2. vil z nobel wäri gsi. Also vil Räbe hets ja da scho kä, aber kei ahnig wa schii da es Tälli hent gseh. Gad uf beide Siite hets chliini Hüggla kä aber va Tal kei Spur. Nach der Enttüschig siiwer wieter nach Adelaide wower nisch de mal wieder es „richtigs“ Näscht und es Tüschli iner Jugendherberge gegönnt hei. Churz dervor heiwer nu Schwein kä dasswer kei Büess vercho hei, iischi Parkziet isch gad abgluffe und di Bulle hent emel öi scho presänz markiert. Aber emal därfe öi wier Glick hä. Nah demwer iischi Akkus iner YHA üfglade hei und churz im Internet sii gsi, heiwer nisch ufe Wäg gmacht um Adelaide unsicher z mache. Zersch siiwer üswärts ga z Nachtässe, also eppis anders als der MC heiwer leider nit gfunde, und hei derna öi nu e Sprung ins Kasino welle ga, aber hei nur welle ga ilüege, kei angscht. Da heinsch nisch de leider nit igla will iischi Schüeh leider z wenig geglänzt heint, aber wenn di gwisst hängi, dass wier potenzieli Verlierera si, hängis apa anersch üsgseh. Aber umso besser. De siiwer de halt in d negschtusch Bar es Pierli ga trieche und e Partie Pool ga spiele. Ufum Heimwäg zer YHA heiwer de nu jeni misteriösi rotschimmrendi Nachtclubs gseh, säg eine nachum andre. Bevor daswer sii ga ligge heiwer nisch nu e Partie Pool gegönnt. Nachera mal wieder warme Nacht heiwer de leider scho wieder miesse üsschecke und hei ische Trip vortgsetzt. Bevor wer Adelaide, also nit gad e schöni Stadt, verlah hei, hets nisch nu ind Haigh’s Chocolat Fabrik verschlage. Di gfiehrte Toure sind leider alli üsgebüecht gsi sodass wer nisch mit dum Chöif va der tierscht Chocolat wani je gmacht hä, hei miesse begniege. Aschliessend siiwer uf d Adelaide Hills wawer ine Wildlife Park si gange, da heiwer mal wieder paar lebändigi Känguruhs gseh und sogar gfüettret. Z Highlight isch de natirli z Foto mit eme Koala gsi. Nach dem churze Bsüech siiwer de nu ufe Gipfel vam Mount Lofty wawer e schöni Üssicht uf Adelaide hängi kä, äs isch de aber leider bewölkt gsi und het grägnet.Churzi Ziit siiwer de ohni Orientierig iner Gägend umcha gfahre bevor wer nisch de in Adalgate verpflegt und nöi orientiert hei. Der negscht Stopp isch de scho Cape Jervis, iner nechi va Kangaroo Island, gsi, wower nisch churzerhand entschlosse hei en Tagestripp nach Kangaroo Island z büeche.Nachera wietere chalte Nacht bim Lookout va Cape Jervis is de öi scho uf d Insla gange. Uf Kangaroo Island heiwer de mal bits abwäxlig in Sache Tierwält chäne bestühne, wier hei Seerobbe und Seelöwe gseh. Nacheme super Lunch heinsch da nu eso e chliini Vogelshow präsentiert wa gar nit eso schlächt isch gsi. Ufer Insla siiwer de nu eso es paar Schgajie ga bschowe wa durch de Wind und der Sand abgschliffe sind worde, di sogenannte Remarkable Rocks. Im spätere Verlöif vam Tag isch de z Wätter öi bits besser worde nach dem dass der ganz Tag meh oder weniger grägnet het. Wieder zrug vam Trip heiwer nisch nu e chliene Imbiss bime Pub welle gönne, wa de aber leider scho züe isch gsi, will Sunntag isch gsi. De heiwer nisch halt va Toastbrott und Zwieble miesse ernähre, isch gar nit so schlächt gsi. D Nacht heiwer de wieder bim Lookout verbrunge wills halt eifach scho z dunkel isch gsi ver wieterzfahre.Victor Harbor isch am Mäntag ische erscht Zwischestopp gsi und wier hei gmerkt dass nur nu 6 Wuche geit.  Da het mu z Füess zure chliine Insla chäne löife was anschienend chlieni Pinguina heige, wier sii um di ganz verflüecht Insla getschalpet und hei kei einzige gseh. Das sägensch apa nur eso dass uberhöipt emal eine uf dii Insla geit. Derna siiwer de jedefalls wieter nach Naracoorte wower nisch nacheme schoene Ubernachtigsplatzji umglueegt hei. Binera Rest Area iner nechi va Naracoorte siwer fuendig worde. Bevor wer hiner z choche sii gange heiwer nu ischers obligatorisch Fueessballtraining absolviert, wier tie gwenli churz vor der Dunkelheit nu bits iischi Fiess biwege und bits jongliere. Z Nachtaesse isch de mal wieder super gsi und nacheme Fierabepierli heiwer der Abe mit gmietlicher Muesig vam Peachi la uesklinge.Am Ziischtag am Morge siiwer z Naracoorte so in e Hoehli, namens Wet Cave, gange, wa de oei sehr interessant isch gsi. Nach dem wer gseh hei dass mu ver das eigentli haengi selle zahle, heiwer nisch de sehr schnaell uesum Stoeib gmacht, will gezahlt ver der Sch..... haengiwer sicher nit. Z Dunkeld siiwer de schnaell ind Information ver Infos uber de Grampians National Park ga z bsorge und hei de da per Zueefall nu es paar oeffentlichi Tuschine gfunde. So e flotti warmi Tusch isch de wiederemal es Troeimli gsi, emel ver z Kegi. Dii Sau isch eso lang am Tusche gsi dass ich de nur nu chalts Wasser hae kae. Im Grampians NP siiwer de nu am glieche Tag ufe Mt. William, hei The Balconies und soagr es paar Reh gseh und hei nisch bim Ranger en Campingbewilligung gholt. Geschter heiwer nisch im NP nu e chlieni Abwäxlig gegoennt und sii Adventure Minigolf ga spiele, isch nu witzig gsi, isch eso en Park mit Kunstrase und jenschte Hindernisse gsi. Das isch de eso gueet gsi dasswer gad 2 mal sus hei durchgspilt. Nach der taeglich sportlich Aktivitaet siiwer wieter uf Port Fairy, ufum Waeg siwer de nu eswo ine Aldi ga ichöife. Da heiwer richtig zueegschlage, emal billigs Pier und Schnapps ver de 1. August geposchtet. Z Port Fairy heiwer nisch z Nacht ubergita und hei de leider nit da chaene bliebe ver z ubernachte will der ganz Ziet di Bulle sind umchagfahre. De heiwer halt mal wieder iner Dunkli nach Warnambool daerfe fahre und hei de da bime Lookout, wiet ewaeg vam Stadtzentrum ubernachtet. Ufem Waeg dahi heiwer nu fasch e Fux agfahre.Hitu morge siiwer voller Hoffnig uefgstande ver Wahla z gseh, hei de aber leider keine gseh. Warnambool siige aebe anschienend dii Wahlmetropola. Nach der ernoeit Enttueschig siiwer vorer es fruscht ichöife ga mache, hei nisch es paar Hose va 12 Dollar gegoennt.

Sodeli isch mal wieder bits e lenger Text, aber weni mal afa schriebe, de chani fasch nit uefhere. Ah iischi Vorbereitige ver de 1. August loeifent uf Hochtoure, maeche es hueere Faescht.