Der zweit Aloeif

Sodeli, wier fühle Säck mäldenisch emal wieder. Momentan siewer nu gad z Cairns und more versüechewers wieder bits wieter z cho. Ver das heiwer nisch e Wicked Camper gmietet mit dem wer der ganz räschtlich Wäg wärde versüeche zrug zlege. Va dene fahrent hie zimli vil umcha. Das sind so ganz üsgfallni Vans wasch mit irgend eme hüere Scheiss beschriftent, wier hoffe jetzt mal dasswer e pinke Van verchäme. Aber äbe sowiet is ja nu nit. Wier hei wieder mal zimli vil während de letschte Täg därfe erläbe und erfahre. So het schich zum Biespil herüsgstellt dass d Lunga vam Kegi z fühl isch gsi mit dum Körper z waxe. Aber uf das chumi nu zrug.
Bevor dass wer nisch de öi uf de Wäg Richtig Cooktown gmacht hei, siiwer nu ga Proviant poschte ver d negschte paar Täg. Wier hei nisch während der Ziet nu rächt gsund ernährt, was wier eis Fleisch und Gmies kocht hei, e wahri Freid. Und de is de öi scho los gange. Zersch siiwer d Mossman Gorge ga alüege, das isch so der Afang va ischem Naturüsflugi gsi. Isch e chlieni Schlucht und es Bachji gsi, nix eso hüere speziels, aber der Naturfreak Tobias het schich va dem voll la fasziniere. Z Kegi und Ich hei sus de öi rächt schnäll gsehs kä. Ih was da eis Touriste het kä, dii chlapprunt appa eifach jedi Sieta va ihrum Reisefiehrer ab gad daschus gseh hent. Güet wier sii ja eigentli nit vil besser, aber regunt nisch gli immer üf. Wills de öi scho nit z spat dunkel isch worde heiwer nisch es flotts Campingplatzji gsüecht. In Daintree Village siiwer de fündig worde, isch es gmietlichs Platzji am Fluss a gsi. In dem Fluss hensch tagdurch Toure wosch Krokodili füettrent, also rächt gfährlichi Sach. Z Nacht heiwer nisch de feini sälbschtgmachti Hamburger kocht, das zum Thema gsund. Nei aber susch heiwer nisch gsund ernährt. Mit es paar Pier, eme flotte Fierli und eme intressante Gspräch mit eme Aussie üs Byron Bay heiwer der Abe gmietli la üsklinge. Am negschte Tag siiwer de wieter Richtig Cape Tribulation. Da isch eigentli nit eso eppis üsergwehnlichs gsi, het schöni Stränd, schöni Rägewälder, halt wieder Natur, isch bits uberall z gliecha. Da wier en 4WD Chare hei kä siiwer durch de Bloomfield Track wieter richtig Cooktown. Der Pfad fiehrt durch de Rägewald und geit nitschi und obschi. Isch voll der holprig Wäg gspickt mit es paar Flussuberquerige wiemu schi üs dum Fernseh kennt. Also ohni 4WD hängisch da kei Chance ver durch z cho. Wier hei eifach immer ghofft dasswer ja niena e Panna hei, will da bisch jetzt wirkli im nirgends gsi. Zwische Cape Tribulation und Cooktown heiwer de in Bloomfield nacheme billige Campingplatz gsüecht und hei nisch nachera Beschäftigung in so eme Kaff umglüegt. Also gad vil hensch nit zer Üswahl kä. Schlussendli heiwer nisch de bim Fische wieder gfunde, ja das isch nu z interessantasta gsi. Der Bsitzer vam Camping het nisch jedem e Stuck Schnüer mit eme Hagge und eme gfrorne Fisch in d Hand getrickt und de heiwer nisch ufe Wäg gmacht. Also gad geboreni Fischera siiwer nit wirkli, darf mu fasch gad gar nit verzelle. Zrug cho siiwer nur nu mit 2 Schnier und keinem Hagge. Doch was isch passiert. Wier hüere Göicha hei d Schnüer ins Wasser gworfe und hei de d Rolla va der Schnüer uf de Bode dargleit und hei bits gmietli mit enander gredet. Wier hei doch nit dermit grächnet dass da uf z mal eppis chänti abiese. Jedefalls het de bi mier epis agebisse und mieni Rolla isch ins Wasser kiet, da in dem Fluss Krokodil dri sind, heiwer schi nime chäne zrug hole. Der Hagge vam Kegi het schi eswa festgebisse und mit dem vam Tobi isch z gliecha passiert. Mit era ernüchtender Bilanz siewer de zum Camping zrug und hei de halt miesse Fleisch anstatt Fisch choche. Super Nasi Goreng hets gigä. Ah dum Bsitzer heiwer de eifach gseit dass e hüere Fisch dra sii gsi und d Rolla nisch üser Hand sii kit, Notlüge. J Am Abe heiwer de nu bim Bsitzer der letscht Match vam State of Origin chäne lüege wa de öi Queensland gegwunne het.Bevor dasswer de am Donnschtag wieter si het nisch de der Campingbsitzer öi nu der Üspuff vam Auto wieder agschweisst, d Haltrig isch durchgroschtet gsi, wie gseit, dii Liet hie sind eifach vil z fründlich. Nah der churz Reparatur siiwer de wiiter uf Cooktown. Churz vor Cooktown isch eso e riese Bärg üs lüter schwarzer Steina gsi, het derna üsgseh als hängisus epper agmalt. In Cooktown sälber siiwer churz uf Grassy Hill, Hügel mit Üssicht uf z Meer, und derna heiwer e nöii sehr attraktivi, strengi Sportart därfe üsiebe, Bowls. Isch nu witzig gsi, aber häsus leider absolut nit im Griff kä, aber ufe Fotos gsehts nu professionell üs. Z Nacht heiwer nisch de feini Röschti mit vil Chäs kocht, isch super gsi.In Cooktown siiwer eigentli nu rächt sportlich gsi, sii nämli am Friitag morge ufe Mount Cook gwandret. Der Bärg isch so zirka 450 Meter hoch und obina hesch e herrlichi Üssicht. Z Kegi und ich heis de aber wieder mal rächt schnäll gsehs kä. Nach dem Morgesport siiwer de nu bits wiiter nördlich gange wower zersch d Endeavour Falls sii ga alüege und derna nu wiiter uf Hope Vale. Hope Vale isch so en Aboriginal Community wos Couloured Sandstrand het. Isch nu rächt cool gsi. Da hets eso Hügla nur üs Sand wa verschiede farbig sind, het hibschi Fotos gigä. Isch es tröimli gsi. Nah dem chliine Abstächer in Norde siiwer de wieder zrug Richtig Mt. Carbine gange. Ufum Wäg heiwer e chliene Zwischestopp bim Byerstown Range Lookout igleit um es Apero z näh und dum Auto e Verschnühfpause z gä, z El isch bits heiss worde. Derna heiwer sus bits provoziert, wier hei e Tankstell üsgla will wer üsgrächnet hei, dass wer biner negschta nu chäne ga tanke. Unerwägs heiwer uf z mal bits Angsch kä dass doch nit längt, si sogar im Neutrale e Bärg ebri gfahre. J Mit 0,8 Liter nu im Tank siiwer de biner Tankställ acho, hei sii wier froh gsi. Nach dem chleine Erläbnis siiwer ufe Gratis Camping gange und hei feine Riis und Chippollata mit Salat kocht.Z Mareeba siiwer am Samstag schnäll ins Internet gange und derna wieter uf Kuranda. Kuranda isch e flähte schiess dräck. Isch zwar scho nu e schöni Gägend mit eme grosse Wasserfall, aber isch nur ver di Touriste gmacht. Wier hei nisch gfrägt ob ächtig da uberhöipt epper wohnt, nur Souvenir Shops, chliene Zoo und e Luftseilbahn ver de Rägewald va obina z gseh. Aber di Luftseilbahn isch flätte wucher, di hängi appa uber 50 Dollar ver der Gspass welle. Nit z spat siiwer de ufe billige Campingplatz gange und heisus da nu bits gechillt, d wärmi bits gegnosse. Am Abe heiwer nu eis gjasst und de nit z spat uner.Am Sunntag siiwer de heil z Cairns wieder acho und hei nisch sofort uf d Süech nachera Unerkunft gmacht. Iner Jugenherberge heiwer de igecheckt und sii am Nahmittag bits z Cairns umcha gsi. Hei de z Sky dive ver am Mäntag nu gebüecht und nu bits ins Internet. Am Abe heiwer nisch nu e Kinobsüech gegönnt, sii ga Hancok mim Will Smith lüege, isch nu güet gsi. Aber hie isch z Kino wieder normal tier gägenüber Brisbane. (14$ : 6$)Am Mäntag morge siiwer de früeh üfsgtande ver ga z Skydive, wa de leider nit stattgfunde het wägem Wätter. Der ganz Morge siiwer de im Internet gsi und hei nisch da bits vertwellt, ich hä eh nu miis Englisch Assessment miesse mache. Am Nahmittag heiwer bits Gäld locker gmacht und sii bits ga shoppe, hei je es paar Badhose geposchtet. Nah dem Shopping Gang heiwer nisch mit dum Jeffrey getroffe, dass isch der Dietsche wa mit iisch uf Alice Springs reist, um ische Trip z plane. Am Abe heiwer nime vil gmacht, halt es paar Billiard Partie.Voll gspannt siiwer de am Ziischtag morge ine Töichkurs gange, der erscht Idruck isch scho super gsi, het Kaffee und Biskuit gigä und d Liet sind öi super fröindlich gsi. Am morge heiwer de chlieni Ifierig und Theorie kä uber z töiche. Während dum Mittagässe heiwer nisch de der fatale Medizinische Unersüechig miesse stelle wa de z Kegi äbe nit durch isch cho, wills anschienend schiis Lungevolumen z chli isch, hei eso en beschissne Puschtetescht miesse mache. Nach dem Ergäbnis heiwer nisch de entschiede, dass ich der Kurs gli mache und äs de eifach mit uf z Schiff cho schnorchle chunt. Am Nahmittag heiwer de d Üsrüschtig zäme gstellt und sii zersch mal ine Pool bits ga Sache iiebe. So Brilla entwässre, tariere, schnüffe, halt so was mu da macht.Was z Kegi während der Ziit het gmacht weisi nit, aber glöibe nix ratschigs. Am Abe heiwer eigentli nur churz üswelle, sii de aber schlussendli gli nu rächt spat und mit es paar Pierlini im Chopf ga ligge. Z Kegi het de schön chäne üsschlafe und ich hä ine Töichkurs miesse. Si zersch bits im Pool gsi und hei derna wieder Theorie kä. Nah dum Mittag hängi wer de im Töichshop mit Prozent eigeni Üsrüschtig chäne chöife, aber das wäri fasch Luxus und isch gli nu rächt tier. Derna heiwer de iischi Üsrüschtig gepackt ver uf z Boot und hei nu bits Theorie kä mit era Abschlussprüfig wani natirli ohni Problem bstande hä. Am Abe siiwer nime lang unerwägs gsi, sii schnäll eswo eppis ga ässe und hei nisch es Fiirabepierli gegönnt, da wer am negschte Tag früeh üf hei miesse.Wie gseit siiwer eppis vor de sägsche üf, willsch nisch churz später biner Unerkunft sind cho abhole. Nachera chliene Ifierig und eme Safety Briefing ufum Boot siiwer de Richtig Great Barrier Reef üsgfahre. Dii Fahrt het 3 Stunde gedührt und äs hent öi zimli es paar während der Ziit d Fischa gfüettret, z Kegi isch glöibi öi churz dervor gsi. Emal acho siiwer de öi sofort zerschtusch mal ga töiche, isch scho nu es komischus Gfühl gsi aber es güets. Zerschtusch mal e Hai gseh isch de öi rächt es unwohls Gfühl gsi, häs aber uberstande. An dem Tag heiwer de nur 2 Töichgäng kä und sii öi nit eso teif gange, appa nur so 12 Meter. Da wer nu nit zertifiziert sii gsi heiwer nu so Unerwasseriebig miesse mache und hei nit eifach chäne lostöiche. Nacheme erschte spannende Töichtag heiwer de am Abe mit 2 andre Schwiizer bime Pierli eine gjasset, wier hei natirli dominiert, dii Grüezini hent sus eifach nit im Griff. Da s am negschte Tag wieder früeh wiiter isch gange siiwer öi nit z spat ins Näscht.Ih ich bi sicher nu nie an mienum Geburtstag eso früeh gweckt worde, ze halbe sibne siiwer appa scho wieder zerschtusch mal im Wasser gsi. Das isch der vorletscht Töichgang als nit zertifizierti Töicher gsi, da heiwer nu so Notüfstieg und so miesse iebe, kei grossi Sach. Derna hets de es super Früehstuck mit Späck und Eier gigä. Mit frischer Energie siewer de öi wieder nit z spat ins Wasser. Und voila so schnäll chats ga und de bisch scho Open Water Diver. An dem Tag heiwer de nu ei Spass Töichgang gmacht, wawer zerschtusch mal ohni Instructor si ga töiche. De häni sogar nu e Geburtstagschüeche vercho und gsungu hensch mer öi nu, zu viel des Guten. D schwiizer und ich hei nisch de nu entschlosse nu der Adventure Diver z mache ver 150$, da chani jetzt anstatt nur 18 Meter 30 Meter töiche. Darum heiwer de am Abe nu e Nachttöichgang kä, hei isch das unheimlich, dü gsehsch so Haia und grossi Fischa um dich schwimme, gsehschus aber gli nit wirkli willt nur e Täschelampa hesch. Nach dem Erläbnis siiwer wieder nit z spar nieder.Am letschte Tag heiwer nu 2 Töichgäng kä und derna siiwer zrug uf Cairns gfahre. Der Töichkurs isch Hammer gsi und z ässe ufum Schiff isch öi super gsi, mim Wätter heiwer eifach nit eso hüere Glick kä. Hei Haia, Wal, Schlidkrote, Nemos etc. gseh. Am Abe siiwer de nu alli vam Kurs zäme ga z Nacht ässe und derna nu es bitzeli fesch ga fäschte. :)Hitu siiwer mit liechtem Nahtag üfgstande und hei eigentli gar nix gmacht. Sii nur bits gmietli iner Jugendherberge am umcha heiche. Am Abe heiwer nisch ver de Party Bus agmaeldet, da fahrensch di va Bar zu Bar und verchusch eso bits z trieche billiger.
Das waeris mal wieder gsi va iescher sieta. Wier maeldenisch va Alice Springs. See ya

Numal fascht es kaputts Auto

Jetz siwer scho wieder e stuck witer… und hei nu kei panna kä, also das mit meh glick chunnt nit schlächt!!

Letscht Donnschtag siwer stah plibe: Am morge siwer nit tspat üf, hei alls zämegrümt, es paar Sandwich gstriche und de heiwer der Palast leider miesse verla…sind 2 gmietlichi Täg gsi, wower so richtig verwennt worde si. Tnegscht Station het Rockhampton gheisse. Da hetz Tobi scho wieder e Famili kennt wower hei terfe nächtige. Da is de nimme so pompös gsi, aber en Billardtisch heintsch kä..
Znacht hets es richtigs güets BBQ gigä mit vil Fleisch und Salad. Der Abe heiwer mit es paar Pier und Billard la üsklinge. Am andre Morge siwer ze 5 üf, will wer nisch natirli tmeglichkeit ver der match zlüege nit hei la entga, aber ja , di göicha heint nix ubertreit…siwer halt wieder ins näscht. Am Tag durch hets nisch ine Crocodile Park zu the caves verschlage. Im Crocodile Park heiwer vellig es paar Fätzna va Crocodil chenne bewundre und in de Tropfsteihöhline isch eu nit schlächt gsi, paar Flädermisch gseh und sogar en kapälla heintsch da dri kä, wo schins vil lit heirate…was dene nit alls zichunnt! Am mabe wieder tiptop gässe und was natrili nit tarf fähle: Pier und Billard. Und en 5-tägige Täuchkurs , wower zCairns wärde absolviere heiwer nu gebüecht. Nachher siwer de lizensierti Profitäucher;-)
Am andre morge heintsch scho wieder kei match gezeigt. Hei de im Nachhinein gseh, dasch gar kei Viertel und Halbfinäl uberträgunt aber derfir fascht alli Gruppespiel..da müessi säge, super sach!
An dem Moge heiwer de Rockhampton name träneriche Abschied verla und si de Richtig Mackay losgezoge.
Iner nechi vo Mackay hets es so es Gebiet wos Wasserfäll het, da isch ische nexscht Stop gsi.
Si de da e schutz monant girrt, hei di unglaubliche Wasserfall pschäut und si da sogar ga bade…also nit alli, Ich( Kevin) hämer nit welle mini Genitalie abfrere, will eso warm is nit gat gsi..Später heiwer nisch es flotts Platzi ver zubernachte gsüecht und si de swo mitsch ines Zuckkerrohrfäld igfahre und heis nisch da gmietli gmacht.
Zum znacht hets wunerbars Thaicurry gigä…Das Tobi isch üsgrischtets unglaubli, da wäri jedi Fröi nidisch;-)!
Di Nacht hets zerschmal gheisse hie zaruschtralie, ime zält penne. Zbeni het wunerbar Platz kä, apa hiena und dana nu e halbe meter Spil..aber ich passe gat just drinna.Hängi gschider es paar Dollar me üsgigä, ver 20 chasch eu nit vil erwarteJ! Und zu allem Übel is de nu en arschchalti nacht gsi! Hä scho besser gschlafe…
Am nahtag siwer ine Nationalpark namens Eungella. Bevor wer der Natinalpark erkundet hei, heiwer zerscht en Campingplatz gsüecht und hei nisch da ignischtet.. nachher siwer de da biz umcha girrt, di schön Landschaft aglüegt nachher nu zume Lookout ame Fluss wo mu Plattypussa gseht (Schnabeltier). Leider isch da keis vo den rächt sältene Tier fircha cho (sind vellig schüchi und mkeischtens gsehsch schi numme am mabe oder am morge früeh) und de sämer zrug ga choche. Heint wieder mal arktischi Verhältnis gherrschtsi eu uf sagehafti 700 m gsi. Ver nisch ebiz üfzwerme, heiwer Holz zämegsüecht und es flotts firli gmacht ver es schutzi. Eu di Nacht isch nit gat berauschend gsi! Morge de zitig üf, wieder an e Lookout und de heiwer endli di hüere Schnaberltier gseh.. isch nu idrucksvoll gsi.
Iner negshct Destination, Airlie Beach is de endli wieder richtig warm gsi. Wie der name scho seit isch Airlie Beach am Meer a.. Isch e chleine voll touristische Ort mit Jenschte Booti und Ville. Isch mer biz wie Cannes oder Nizza vorcho. Also wirkli schön.. An dem Tag isch nimme vil gluffe, gechillt und nu ins Internetcafe und am mabe mal wieder richtig Üsgang. Wies nit annersch cha si heiwer da wieder di gliche Schwizer wower scho Agnes Water hei gseh, getroffe. Isch es flotts Fäschgji gsi…
Am Zischtag is de nimme so schnäll gange mit üfstah..alli biz nahtägige gsi. Schlussendli heiwer sde doch nu gschafft alles zämezrüme und de 12h n siwer ane Hafe ver ische 2-tägig Sägeltrip azträtte mit dum Racing Boot Samurai. Da siwer apa 4h Stunde am warte gsi..will nisch der vaner Travel Agency verarscht het. Hängli eigentli erscht am 4 miesse da si. Hei ja suscht nix bessers tüe..
Na der Tortur isch de zBoot na de 4 in See gstoche. 10 Persone und 4 crew Mitglieder. Und de sind di Hächte losgsäglet, isch e wahri Freid gsi, der Wind isch super gsi..Si de nimme so wit und hei vorere Insla agleit und zum Znacht heintsch es BBQ gmacht. Na dem wunerbare Ässe Sind de alli nit tspat ga ligge, segle sooo streng!
Isch nu es speziells Gfühl gsi ind dene chleine Betti und den ununerbrochne Schaukle. Aber Hei emmel wunerbar gschlafe. Am negschte tag isch de vellig früeh Tagwacht gsi und de is wieder ans Sägle gange.. aber nur bis zer negscht Insla. Isch unglaublich, Bi Airlie Beach hets um di 70 Insle, dene sägentsch Whitesunday Islands, tmeischte numme winzig chlei und natrili unbewohnt. Uf es Paar heintsch es paar Hitjini oder Resorts.
Äbe bi der negscht Insla siwer de ga schnorchle, isch nit schlächt gsi. Koralle und jenschti Fischa gseh..Nachher siwer zer negscht Insla, isch apa die Bekannteschta, tWhitesunday Island. Da siwer de an Land und hei die Insla pschäut. Der Strand isch sackgenial gsi, voll wisse Sand. Und Zwasser türkisblau (gsehder ufe Foto).
Am spätre Namittag siwer numal zure andre Insla gseglet und da hets äbe es Resort kä. Hei da es paar Pier getrüche und heshc chenne tusche und e Billardtisch hets eu nu kä….
Ja und de wieder zglich Spiltji: ässe, schlafe, üfstah, früehstuck, sägle, schnorchle wieder ässe und de zruggseglut uf Airliebeach. Also müess säge, isch e super Trip gsi, mal epis neus. Mim Wätter heiwer nit so Glick kä, isch meischtens bewölkt gsi..
Ja na dene ganze Segelstrapaze siwer nu zum negschte Ort gfahre, zu Townsville. Isch kei speziells Stadtji, aber da heiwer wieder swo chenne penne. Will Ztobisch Gastfamili da Kolege het. Super Sach, höiptsach so wenig wie megli in dem Scheiss Zält penne….
Da heiwer de leider nix zässe vercho, willsch numme eine erwartet heint..Ja de siwer mal so richtig ga italienisch ässe! Ver auschtralischi Verhältnis nimmi a dass das sackgenial isch gsi, aber ja wier si halt bessers gegwennt. Aber isch nit soo huere beschisse gsi!
Am andre Morge wieder früeh üf! Wier wärde hie nu zu vellige Früehaufsteher. Nachher heiwer mal wider richtig miesse ga ichäufe ver tnegschte Täg si nu schnäll uf es Bärgji emüf wo mu e super Üssicht het kä und si de eu scho wieder los. 50 km nördkich va Townswille hets e Nationalpark mit Camping und da siwer de müf gfahre. Da heiwer nisch e biz umglüegt nachher uf dene Camping, nisch es flotts Znacht kocht, Cordon Bleu und Härpfel (deliziös gsi) ja und de der abe gmietli la üsklinge und de mal einisch ga ligge.
Nachere witere komfortable Nacht in ischum 5 ½ Zaelt heiwer tszig wieder zaemegepackt und de is witer zerscht uf Ingham und de uf Cordwelle gange. Da het der Theater mit dum Auto agfange ( mal epis neus...)
Zmal hets nisch der Motor uberhitzt. De heiwer halt nahgluegt und gseh dass Zschutzblaech vam Venti isch grisse isch gsi und Zschutzblaech durch das ufe Venti isch cho und eso hets de di ganz ruschtig uberhitzt. De siwer zum negschte Mech..der het nix chenne mache, het numme gseit dass mu der ganz venti sellti ueswaegsle, aer heige aber nix da und eu kei zit. Undo so heiwer Zschutzblaech uessagrisse und gedeicht dass geit de scho und de miesse wer halt bim negschte Toyotahaendler luege was loift. De aebu wieder witer und hei de emmel kei Problem meh kae... Der negscht Ort isch de Mission Beach gsi. Da heiwer e flotte Camping am Meer a gfunne, hei nisch Tortillas gmacht und nachehr ins negscht Pub welle mim Auto. Ungluecklicherwis isch de das nit gange, will sobald en Gang hesch dri gita und hesch Gas gigae het der Motor numme durchgedraeht.. Zeinziga wo isch gange isch der Gelaendegang gsi.
Am nahtag haengiwer eigentli welle ga Fallschirmspringe, isch de aber nix gsi, will leids waetter isch gsi. Sunntag isch eu nu gsi..also kei Mechaniker het gschafft. Hei halt ins Dorf miesse tschalpe(6km) hei da biz umchagheicht und de wieder zrug. Am Mabe ufum Camping heiwer en Auschtralier kenneglehrt. Voll der krass Siaech. Isch irgendeswie tletschet 9 jahr numme am reise gsi iner ganz waelt. Mit ihm heiwer de nu biz gepierlinet... Durch das das aer Member isch bim RACQ ( so wie TCS) heintsch nisch de gratis abgschleppt zum negschte Mech. Da heintsch eu nit wirkli witergwisst. Teinzig Meglichkeit isch gsi, der Chare zum negschte Ort (Innisfail) abzschleppe wills da en Toyota Garage het. Ich und Zbeni hei de der Bus miesse nae und zTobi isch mim Abschlepepr mitgfahre.
Zinnisfail heintsch gseit mu miesse zganz Getriebe ueftue und halt luege was da los isch aber wuerdi um di 3500 fr choschte und mu chennes numme zcairns mache. Ztobi isch de halt verstaendlicherwis raecht niedergschlage gsi und het de probiert ne irgendeswo zverchoife. Eine het mu de gseit vili chaeufe aer ne aber wier selle am negschte Tag numal verbi cho. Alli halt raecht niedergschlage siwer zerscht epis ga aesse und nisch de nachehr swo es backpacker welle sueche. Ine chare igstige und de is ufzmal wieder gange..Wier si fasch zrug ufe Rigg kit und hei gat e schutz gibaetet;-) de heiwer nisch gedeicht wenn der Chare scho loift fahre wer diraekt uf cairns. Das het de emmel wunerbar giklappt. Ich und zbeni si de voll ines edel Backpacker mit Swimming Pool, riesige Betti, eigender Tusch und mime Pool Table ga ichecke.Ztobi het de in schinum chare gnaechtigt, Da heiwer de wieder Tschwizer getroffe wo scho zagnes water und zairlie beach sind gsi. Mit dene de Spaeter ine Uesgang und nachher mal wieder en herrlichi Nacht ime richtige Bett verbrunge.
Hitte morge mit neu gschoepftum Muet uef ha tusche und de leider scho wieder miesse ueschecke.
jetz gat vorer siwer hie int Toyota Garage, die heint gmeint schi chenne eu nit vil mache jetz wo der chare wieder tiptop lauft. Schi miessti halt di Ruschtig uefmache und chenne nit verspraeche dasch epis finnent. Und das choschtet halt wieder vellig epis.. Jetz fahrewer halt mal uf gut Glueck uf Cooktown und de am Sunntag oder Maentag wider zrug, hoffentli!! Ja und der fallschirmsprung maechewer apa de eu nu swe negscht wucha, je nach dem wies mim Glick uesgseht negscht WuchaJ!

Ja das isch halt jetz mal wieder en lengere text gsi..si halt nit gross derzue cho in letschter zit. Ich hoffe ier schlafet nit i bim laese...

Ab dri!

So schnäll chats ga bis wer nisch wieder mälde. Jetzt heiwer gad es herrlichs Nachtässe verspisse kocht va der Grossmüetter va der Gastfamili vam Schwiizer Kolleg va dem wahnisch mit schienem chare bis uf Cairns mit nimmt. Tehnt kompliziert, isch aber eso. Hei wieder epis erläbt hie z Australia.

Am Mäntag heiwer nisch de z erscht emal es Billet ver de Bus miesse organisiere, damit wer am Nahtag uberhöipt zrug uf Bundaberg hei chäne ga um da der Schwiizer z träfe. Das isch de gar nit eso eifach gsi, wills in dem Kaff kei gressere Busbahnhof oder eppis het kä. Aber zum Glück het epper anu düezumal z Internet erfunde. Derna heiwer nisch ufe Wäg zer Gararge gmacht um abzkläre ob mu mim Van nu eppis cha mache oder ob wirkli als verbie isch. Isch de leider nix meh gsi mit flicke. D einzig Möglichkeit nu eppis ver de Van z vercho isch gsi ne dum Besitzer va der Scooter Vermietig gsi. Da das eso en h..... Halsabschnieder isch gsi heiwer de leider öi nit eso vil vercho. Aber äbe, besser wa gar nix. Nah dem super Deal heiwernisch wieder mit de andre Schwiizer am Strand getroffe um da der letscht Tag in Agnes Water z gniesse. Hei bits am Strand ghängt und gitschuttet, isch gmietli gsi. Am Abe heinsch nisch de nu zure gmietliche Grillade iglade. Da schii scho z Ässe ubernu heint, hei de wier halt spontan es paar Pier geposchtet, nit dass schi lähr üsgähnt. Nah dum feine Ässe isch de nu epper uf di grandios Idee cho eine z schiebre. Am Afang heiwer nisch nu gedeicht moll, aber schlussendli miessewer säge, gopf chänent dii grüezini nit jasse. Erschtens siiwer z sägscht gsi, japapa, de heiwer ja mit dopplete Charte miesse spiele, japapa und de heiwer halt NUR französischi Charte kä. Ja jedefalls is de am Schluss einigermasse gange. Nach es paar Pier is de gli nu witzig gsi.

Am Ziischtag siiwer de früeh üse Fädre um iische Bus ze halbe sibne z verwitsche. Z Bundaberg de acho heiwer zersch emal iischers Gepäck miesse unerbringe. Der ganz Tag heiwer nisch de z Bundy bits vertwellt will wer ersch am Abe mim Tobias, äbe der Schwiizer, abgmacht hei. Sii bits ga shoppe, bits ga Pool spiele aber d meischti Ziet siiwer irgend eswo am umcha heiche gsi. Der Tag isch de leider nit eso schnäll verbie gange wiewer nisch erhofft hei. Nah dem interessanteschte Tag va iischem Trip bis jetzt heiwer nisch de mit dem Andre getroffe. Isch nu e gäbige Siech. Z Auto waner het isch eso en Jeep ähnliche Chare, isch nu easy. Das Pirschtli het öi alles im Auto wame brücht ver eso en Trip, isch sogar besser üsgrischtet als sus wier sii gsi. Nah dem dasswer de iischers Gepäck verfrachtet hei, sii wer de wieter zume Kolleg va im. Der wohnt binera Gastfamili und isch jetzt gad bald es Jahr scho hie. Jedefalls siewer hie üfgnu worde wie chlieni Herrgöttlini. Dii hent es riese Hüs und wier hei sogar es eigens Zimmer vercho mit eme riese Fernseh, see pics, und eme eigene Badzimmer. Nacheme chliene Nachtässe heiwer nu schnäll d Wäsch gmacht und sii de öi ga ligge.

Hitu am Morge heiwer nu der Match im Fern glüegt und de öi nit z spat üf. Hitu heiwer nu schnäll bits Campingüsrischtig köift, sprich es Zält, will z Auto z chli isch ver alli dri z ligge. Derna siiwer ane Üssichtspunkt gange wont d ganz Region chasch uberblicke. Z Mittag heiwer nisch de am Strand a gegönnt. Hei gmietli der Gasgrill ane Strand gnu und hei da gmietli es paar Steaks ubergita. Isch der Hammer gsi. Nacheme Glace siiwer wieder zrug und hei wieder es wunderbars Nachtässe ufem Tisch kä.

Sodeli das wäris emal wieder gsi va iisch Oz`s! More geits de wieter richtig Rockhampton, aber vorher lüegewer de appa nu der Match. See ya, ewe Benjamin

600 KM später, over und aus

Ich säge euw die purschte heint wieder es glick kä tletschte täg, das glöibent 3 eleinig nit. Ja am Zischtag heiwer ische super Trip gstartet…hei nisch zersch durch de Stau durch Brisbane miesse kämpfe und durch di ganze Vorerter.Z Beni isch gfahre, vili siwer eu wägs dem nit va tätsch cho… Si de darum nimme so wit cho, will ze 5 hets afa idunkle. Der erscht Stop isch in Moodooloba gsi, es chlis Kaff am Meer a. Na dem dass wer si acho heiwer es flotts Stuck Fleisch uber geta anere öffentliche BBQ Stell. Derna heiwer de es Pub gsüecht, hei de nit wirkli epis gfunne und so siwer de nit tspat ga ligge.
Am andre Morge siwer de mitsch inere Baustell erwacht, aber hei de ohni Problem chenne wägfahre. Tnegscht Destination wawer agstiret hei isch Noosa gsi, isch es schöns Dorfji aber ehner epis ver Richeri, si biz ga bummle, ga surfe und de ane Sunshine Beach ga plantsche. Und de siwer eu scho witer gfahre uf Maryborough. Da heiwer de zerschtmal ische Gasgrill gebrücht, hei nisch flott es paar Spahetti uber geta…mmh fasch wie Deheime gsi! Später nu ines Pub ga Rugby(State of Origin, jetzt isch 1:1 zwische Queensland und New South Wales) lüege und es paar Partie Billard spile und de swe int Häija!
Morge früeh üf und de siwer wieder losgedüst richtig Hervey Bay, da siwer nur schnäll durchgfahre und int tnegscht Wältstadt wawer si igitrudlet het Bundaberg gheisse, da produzierentsch da der wältbekannt Rum, wer kennt ne nit! Vo da hängiwer uf Agnes Water welle, aber ja ische Van het halt nit wirkli Luscht kä. Uf halbum Wäg heder gottlos afa komisch tene, de heiwer gedeicht, njä apa mal zer negscht Garage, aber ja 5 minüte später het Shitbox eifach nimme witerwelle und de hets kläpft, gräuchnet und weiss nit was alls leida….Eswas Teilti vam Motor heiwer eu nu verlore und ja de siwer mitsch im Urwald gsi, keis Nätz, kei Mänsch, kei Fröjie, kei Liäbi, kei….äbu, si rächt am verzwifle gsi. De heiwer halt mal miesse probiere ob nisch eper hilft, z 2. Auto het de eu scho aghalte (das chenntisch bi isch vergässe…). De sind di zwei Hächte üsgstige, eine het es Pier iner Hand kä und der andre suscht es Gsöff, sehr vertrauenswürdig. Aber schi sind hilfsbereit gsi, heint sofort Tsach int thand gnu und dum Abschleppdienscht aglitet, de hets gheisse die Purschte „sellti“ in 2h aricke. 4h später sind der Kevin und der Benjamin immer nu am warte gsi. Isch de scho 9 gsi und halt stockfischter, aber en Laschtwage het emmel nu aghalte, die heinte nu mal dum gliche Lappi aglitet und de heintsch nisch de versproche dasch nisch am negschte Morge abschleppent. Naja, mit neuer Hoffnig ga ligge, morge üf..und de isch das Spiltji wieder vo vorna losgange, warte, warte und numal warte, gat dass wer das vam Militär gegwenti si. Gägs Mittag isch immer nu niemert da gsi…churz vorum verdurschte und verhungre heiwer nisch de entschiede ztrampe bis uf Agnes Water. Diz mal is de nimme so eifach gsi, isch de glich e Stund gange bis nisch de en jungi Fröji namens Emma afa e Stuck het mitgnu..der letscht Stuck siwer de mime andre mit und de siwer endli bi der super Garage gsi, wo nisch hängi selle abschleppe. Di heint de natirli va dem nix gswisst, aber gägs sagehafti 300 Stuz heintsch de ische Chare abgschleppt. Mim Chare acho iner Garage, isch die Diagnose gsi, tShitbox brücht en neue Motor, voila. Wiener cha das chennt vorstelle isch nisch das ebiz ztir und somit heiwer afa mal vellig vil Gäld üssum Feischter gschmisse (aber zum Glick spilt ja Gäld hitzutagsch nur nu en unbeditendi Rolla in ischer Gsellschaft) und ische Trip miesswer eu umplane. Aber zerschmal zrug was wer na der erschütterndu Diagnosa gmacht hei.Hei ischi sibe Sache gepackt und si ins negscht Backpacker gezoge. Da acho heiwer de endli mal wieder chenne tusche. Isch wirkli en Tröim in dem Backpacker, vil Platz im Zimmer, geili Umgäbig und alls isch wirkli super gmachts. Und eu der Ort sälber, isch zwar gar nix los , aber hüere idyllisch und geile Strand. Richtig zum entspanne.Am mabe heiwer nisch uf der Schreck eifach mal epis miesse gönne, si ines Restaurant ga fruschtässe. 350g Rumpsteak mit Crevette, der vittlaplut Wahnsinn. Später hets nisch nu ins einzig Pub gschreckt hie mit es paar Titsche wower hie hei kenneglehrt.Am Samstag ze 10 üf und de siwer mime Titsche zu der Garage gfahre, wosch nisch de äbu verkündut heint dass das vil zvil wird choschte der Van zrepariere. Und nachher witer zu schinum Chef, dem kehrt en Töffverleih und der het nisch de gseit dass er nisch ische Van vili abchäuft ver es paar Hundert Stutz (wenigschtens das). Am Namittag nu biz ane Strand ga bädele und ga tschuttele. Und am mabe heiwer nu ischers Surfbrett eme Titsche chenne verchäufe ver 170 Stuz.Am Sunntig heiwer en 1 Tages Trip uf tLady Musgrave gmacht,das isch en naheglägini winzigchleini Insla. Siwer zersch fascht 2 Stunde mim Böttli verüs gfahre. Isch vellig en Wällegang gsi und de het das Chotzgelage agfange. Vor isch het en 5 chöpfigi Famili ghockt, da het jede kotzt üsser der Vater und eu suscht heint schi es paar alles numal durch de Chopf la ga. Schöni Atemosaphera gsi! Da acho siwer de zersch biz ga schnorchle. Um di Insla rumherum hets es hüere Riff. Nachher Tinsla ga besichtige, ässe und wieder ga schnorchle. Hei sogar es paar Schildchrote gseh und der Nemo. Alo isch vellig idrücklich gsi.Am mabe häni es Sms vercho vare Schwizeri, wo eu zBrisbane iner Schüel isch gsi, Afa mal sige schi mit es paar andre am gliche Ort wie wier und 2. Heige schi swo annersch en Schwizer getroffe, der het eu es Auto und süeche nu Mitfahrer. De häni dem mal aglite und jetz träffe wer nisch more zBundaberg und fahre de mit ihm witer ver uf Cairns. Spare wer vil Gäld und ja isch intressanter wa mim Bus zreise….mal wieder es biz Gick kä.Ja und an dem Abe siwer nu mit de andre Schwizer nu e Sprung ins Pub. Jetz heiwer Sunntag und si froh dass tSchwizer doch nu swas gegwunne heint und entsetzt dass di hüere Türke sind witer cho,hüere Ärger. Später gäwer nu zu dum eintu vam Töffverleih und hoffe dass ver nu biz money verchäme ver ischi Schlätterchischta…Ich hoffe ischi Glückssträhna fäge jetz a und ier miesset kei unerfreulichi Nachrichte vo isch läse;-)Bis zum negschte mal, see ya

Das Warten hat ein Ende

So jetzt siewer nu es letschts mal in ieschum Guesthouse und sii scho agspannt ver iische wieter Trip. Jetzt heissts nu es letschts mal eso richtig eine ga topfe und de ab dri!
D letschte paar Täg hie z Brisi heiwer nu mal so richtig gegnosse.

Am Frietag siewer de nu es letschts mal in d Schüel gange, wower de öi iischers grandios Zertifikat vercho hei. Dasswer nisch nit uberta hei, siewer ze elfe mit der ganz Klass nu es Abschiedskäffeeli ga trieche. Am Nahmittag de nu e Stund in d Schüel und nah dem heiwer nisch dum tränerieche Abschied gstellt. Am Abe heiwer nu es chlies BBQ mit es paar Japsini kä, isch nu luschtig gsi. Nacheme churze Kasino Gang heiwer der Abe mit es paar Pierlini ime Pub abgrundet.

Am Samstag heiwer nisch de mit es paar alt bekannte üsum Wallis getroffe. Z Weissi und z Luki sind gad per Züefall öi iner Stadt umcha gsi. Sii gmietli zäme eppis ga trieche und hei de aschliessend nu es BBQ bi isch verastaltet. Nach dem gedigenu Nachtässe siiwer nit z spat in Stadt ver nisch e güete Platz z sicher ver de Match z lüege. Nach es paar Pierlini is de endli losgange. Wier hei rächt mitgfiebret und hei d Schwiizer agfiieret, aber hent nisch apa nit khert. Sind nu rächt vil Schwiizer gsi, de is nu witzig gsi. Der Portugal Match heiwer öi nu mitvercho und sii de afa ze sibne am morge deheim gsi.

Am Sunntag heiwer de ersch emal miesse üsschlafe und derna is hiner z packe gange. I hate it! Derna siiwer de mal wieder ind Stadt ver d Match mitzverfolge, z Weissi und z Luki sind öi wieder mit va der Partie gsi. Nachera bittera Niederlag vam Federer heinsch nisch de üsum Pub getriebe und hei de halt vorna ime andere Pub miesse ga d Füessballmatch lüege. D Östriecher sind ja gar nit eso schlächt. Da hets de leider öi kei Pier meh gä und de heiwer d Match ohni miesse mitverfolge. Das geit doch uf kei Chüehüt! Der Match va de Dietsche heiwer leider öi nu gseh. De heiwer nisch de wieder ze sibne zum Van gschleppt und hei flott üsgschlafe.

Geschter heiwer nisch scho am Nahmittag mit dum Weissi und Luki getroffe und hei zäme ime Pub, Steakhouse, emal wieder e flotte Schieber gjasst. Das isch es tröimli gsi mal wieder mit eme Doppelspiel chäne z jasse. Hei de bis ze niene Chartespieli gspielt und derna heiwer de langsam Hunger kä. Willsch de aber genau ze niene bim Steakhouse d Chuchi gschlosse heint, heiwer de mal wieder ine Subway miesse ga. Derna heiwer nisch getrennt um es paar Stunde ga z ligge und derna de wieder z träffe ver em morge früeh der Holland-Italie Match z lüege. Z Kegi und ich hei de emel nimme üf mäge, het mi gad fasch bits hert. Hängis gäre gse.

Ja hitu heiwer nime gross gleischtet. Sii nu es letschts mal in d Stadt ver eppis chlies z ässe und nisch va de andre Walliser z verabschiede.

Ja ich wellti mich hie an der Stell offiziell va Brisbane abmälde! Wier mächenisch auf den langersehnten Trip durch Australia. Wier wärdenisch so bald wie meglich wieder mälde.

See ya und gniesset di Ziet, also wier wärdes!!

A Hirsch

So, der Kevin tarf mal wieder epis verzelle. Ine letschte 8 Täg isch wieder vellig epis passiert, unglaublichi Sache säg Ich euw, ier wärdets gar nit glöibe. Wird cha vam Hocker risse…

Äbe ja fäwer doch am beschte mal mit dum letschte Mittwoch a: An dem Tag siwer zerscht mal ines Suschi Restaurant. Hei der Claes begleitet (Sweden Guy), da wer scho deheime hei gässe, heiwer dizmal numme züeglüegt. 14 Fr. müesch zahle und de chasch so vil ässe wient willt. Der Claes het de eu vellig igibige und wier hei nisch de vorgnu es tagsch de eu mal Suschi zässe. Am mabe siwer mal wieder ins casino, Ich hä 150 fr. gwunne und ja, Zbeni nitJ! Zerschmal iner Gschicht siwer nit ins Downunder, will wer gottlos hängi miesse astah.
Am Donnschtag siwer mim Wan ine Garage ver ne vorzfiehre, isch de leider nit durchcho, aber nur wägs Chleinigkeite. isch halt alles numme Gäldmacherie, isch alles rächt beschisse greglut hie. Ver Tregischtration müesch ne äbe vorfiehre obwohl tvordre Besitzer dass scho mal im Februar gmacht heint aber äbu ime andre Staat, in Victoria und jetz chasch da äbu nit eifach der Name wägsle, ver das brüchtiwer äbe en adräss in Victoria. Und so regischtriere wer ne halt hie, müesch halt wieder zahle. Isch miehsam jede Staat het ganz andri Regle, aber wird scho funktionagle bis zletscht…der ganz Namittag heiwer nisch de ab dem vellig üfgregt bis de dum Isaac afa isch zi cho dass är en Freund het wo Mechaniker isch..So wies üsgseht wird das jetz alles tiptop klappe mit der Regischtration und wier chenne endli uf Reise negscht Wucha, juhuuu…
Ja und nam Donnschtag isch de der Fritag cho. Am mabe heiwer zerscht big Party in Adalong kä und später bin ich und es paar ins downunder und zbeni isch mime andre Schwizer int Mustang Bar iner Valley, da isch Studänte Pary va ischer Schüel gsi. An dem Abe heiwer mal wieder es paar schöni Wuche erläbt und si de eu nit so früeh bzw. schpat ins näscht!
Der Samstag durch isch de e biz Hangover agseit gsi und am mabe endli mal wieder BBQ. Endli mal wieder es richtigs, dicks, saftigs Steak zwische die Bissera vercho, isch der vittlaplutt Wahnsinn gsi…Der drüffolgend Üsgang isch de nimme so üsschweifend üsgfalle, gmietli ines Irish Pub ighockt.
Am Sunntag heiwer nisch de ins Suschi Restaurant gwagt. Isch de eu gar nit mal so hüere schlächt gsi wiewer gedeicht hei, heis nu gäre kä. Aber eismal isch güet und de heschus ver e schutzi gsehs…Mit vollum Büch siwer de an dem Abe nu ga Füessball Match lüege, Australie gägs Iraq (1:0). Zniveau isch zwar nit so hoch gsi, aber tstimmig isch afa biz besser gsi als ime rugby oder afl match und Tstadion isch üsverchäuft gsi. Na dem mitrissundu Game hets nisch nu ins Kino verschlage, Iron Man ga lüege, isch nit schlächt gsi.Vil besser wa der Indiana Jones, vo dem Film bini scho vellig endtüschte…

Vo Sunntag bis Mäntäg heiwer grotteschlächts Wätter kä, zituwis sinflüetartige Räge, no nie so epis gseh. Ja und wägs dem hüere räge siwer de am Mäntag nit int Schüel, isch nisch znass gsi..Da das der letscht Tag vam Ivo(Swiss Guy) und dum Claes isch gsi, heiwer de am mabe nu chleini Abschiedsparty kä.. Züefälligerwis heint die zwei genau der glich Fleiger kä am Zischtag, Twält isch so chlei…Am Zischtag int Schüel, derna ga schoppe und am mabe siwer ines Pub ga pokre, jedi wucha heintsch am Zischtag und am Fritag Turnieri. Chasch gratis ga mitspile. Durch das siwer jetz Member bi der Australian Poker league, nit schlächt häh..:-)!
Am Mittwoch heiwer nisch en Jumpstarter käuft, da wer am zischtag der Wan nit zum läufe gibrunge hei, super Teil das, funktioniert wunerbar. Vili isch der ganz Räge biz Zproblem gsi, die Chäre sind eifach nit gmachti ver sottigs Wätter. Ja und de halt am mabe wie chas eu annersch si ins Downunder. Hei vellig eine durchgigä, will isch ja ische letscht Mittwoch im Downunder gsi..Zbeni isch so ze 3 Heim und ich bi de afa ze 7 mal swe in Adalong acho.. Stunde und Stunde miesse heim läufe.. äbe ja weni heim bi cho isch zbeni ufer couch am penne gsi da ich gwenli der Schlussel mithä..isch luschtig gsi will ab de halbe 7 gähnt tmeischte ga früehstuckeJ Hitte der Tag durch isch nimme vil passiert, Pizza pstellt und fernseh glüegt.

Wasi nu vergässe hä, si nit emal terschte gsi wo im Wan gschlafe heint, Sunntag bis Zischtag het der Claes in ischer Shitbox residiert, will er üssum Zimmer het miesse üszieh,är het emmel gmeint si rächt confortable und mu schlafe tiptop. Jetz heiwer nu more Schüel und de chennwer de endli negscht Wucha uf reise.. Tschüel isch nimme so intressant, Tstadt heiwer eu langsam gsehs und ja hie in Adalong sind mer biz zvil Titschi. Momentan sind apa 17 va dem Gschwader hie.. Ja nu, chasch nit immer gwinne! So das is wieder mal gsi, vili giz churz bevor wer gä numal e Bricht, will warschinli chämewer nachher de nimme so derzüe…

PS. Schribet nisch uf ischi australische Nummer, isch gäbiger ver isch.

Lets talk about iischi letscht wucha

So äs isch wieder emal eso wiet, d fühle Säck üs Australie mäldend schi wieder emal. Juhui! Obwohl eso fühl siewer gar nit, iisch chunt eifach immer eppis derzwische, öi wenns „nur“ es Pier isch.
Äbe, was heiwer d letscht Wucha als eso erläbt. Isch im Fall nu schwierig alles mäge z bhalte. Wier hei immer Krisesitzig, ver z bespräche waswer scho wieder als eso erläbt hei, bevor dass eine mim Text schriebe afaht. Langsam siewer aber bits ime fixe Tagesablöif dri, so dass nimme so schwierig isch. Aber es wird bald emal Ziet eppis nöis z erläbe.

Zu dem alltägliche Ablöif khert öi der Pub Bsüech wa de z Kegi am letschte Mäntag, nah dem dass der vorder Text gschriebe het, uf schich het gnu. Ich hä bits schlächts Gwisse kä vam Weekend här und hä de mal wieder eppis ver di Gsundheit gita und bi es bits ga jogge. Hä de aber rächt schnäll z Gwisse berüehigt kä und bi darum de wieder rächt schnäll zrug gsi.
Am Ziischtag siewer de richtig froh gsi we d Schüel verbie isch gsi und wer Heim hiner d Wäsch hei chäne ga. Nit daswer zu richtige Hüsmänner avanciert wäri, aber siet der Wucha heiwer e Schwie längwieligi Lehreri. Dii Fröi behandelt nisch wie chliini Chinder und iisch voll z Kontrollfreak, dii vorher isch vill easier gsi. Nah der Wäsch siiwer de wieder emal ins Pub bits ga Billiard spiele. Später heiwer nisch de nu ines anders Pub gitruwt, hets aber leider kei Pool Tisch. Dafer hensch es luschtigs Quiz namens Trivia, want chasch gratis Rundine gwinne. Wier sii de leider z spat gsi ver da mitzmache, hei de aber es paar Australierinne gholfe, oder sus emel versüecht.
Der Mittwoch, ja was solli säge, mal wieder Down Under. Vor dem heiwer aber nu eis va de emotionalvollschte Matchs ufer Wält chäne mitverfolge. Schii sägent emel äs siige z emotionalvollschta. Scho während der Schüel heiwer uber das Ereignis gredet und öi d Iheimische va hie dum Guesthouse hent nisch gwarnt, ja nit blaus Gwand azlegge. Äbe müess apa nu erkläre was das ufschich het. Der Match heisst State of Origin und isch e Match wa Spieler stammend üs New South Wales(blaus Dress) gäge Spielera üs Queensland(rots Dress) spielent. Isch nu e rächt patriotische Hinergrund wa d Spielera nur um die Ehre spielunt, ver irusch „State“. Der wa va 3 Spieli am meischte gwinnt chaschi appa es Balli ga hole J, nei seich, gwinnt irgend eso en Pokal oder eppis. Jedefalls hent de d falsche gegwunne, New South Wales. Voller Fruscht siewer de erscht später ins Down Under und hei de d Niederlag emel rächt schnäll vergässe kä. Z Fäschtji isch nu rächt witzig gsi und ich bi de emal fröhlich nit z spat heim. Summi heint die Nacht durchgmacht, mu weiss nit wo, gäll Kegi, nur ver z lüege wie Manchester United Champions League Sieger wird. Ich häs leider verpasst, bi z fühl gsi.
Aber!! Am Donnschtag siewer gli in d Schüel. Sumi zwar bits weniger lang wa der andre. Z Kegi isch z Mittag scho heim, chas nit verstah. An dem Tag heiwer nime gad wältbiwegendi Sache gleischtet. Sii aber de gli nit gad früeh ins Näscht, sii eifach nit miedi gsi. Iisch bringsch scho nit nider.
Frietag heiwer de iische langersehnti Termin kä ver z Auto z besichtige. Hei durch das leider d Schüel verpasst. Wier hei zer Hilf nu iische australisch Kolleg mitgnu, isch aber nit nehtig gsi, will nisch Diitschi der Chare verchöift hent. Gopf!! Diitschi hets ja nu meh wa Schwiizer! Wier hei nisch diräkt verliebt! Nachera chliene Spritztour siiwer nisch sicher gsi, das is unser Baby! In dem Momänt heiwer nu nit gwisst, dass es eso miesam isch en Registrierig vam andre State lah umzschriebe. Jedefalls, wier hei es Auto. Ubergabe Zietpunkt heiwer nisch uf hitu geinigt, Ziischtag. Güetglühnt siewer de heim eppis ga ässe und am Nahmittag in d Stadt. Iner Stadt siiwer zum züeständige Amt fer Transport gange ver das genau z kläre wäge Plagga lah umschriebe und Registrierig. Hey sind dii kompliziert. Schii akzeptiere kei Registrierig va Victoria. Äs isch eis Land, aber uberall heinsch andri Regle, jedefalls heiwer evt. e Lesig, susch miessewer di ganz Registrierig numal mache. Nach dem Ärger heiwernisch wieder e bits miesse abregu und sii de jedefalls am Abe bits ine Üsgang. Sii mal wieder ins Kasino gsi. Der Abe isch nit im Zeiche vam Glick gsi, niemer het gegwunne. Iische australisch Kolleg, der Isaac, het zimli vil verspielt, appa uber 600 Dollar. Aber wier sii nit eso spendabel gsi. Ze 12-e isch de z Kegi und der Isaac scho heim. Ich bi mit eme andre Schwiizer nu es Hüs wieter. Paar Kollege hent versüecht Karaoke z singe, isch nu gar nit emal eso hüere güet gsi. Später siiwer de richtig Heim und da heiwer de z Kegi iner Couch schlafent üfgfunde. Nahm Üsgang vesüeche en Film z lüege isch nu nie güet cho.

Samstag heiwer mal wieder fasch nit üse Fädre mäge. Isch so schön üszschlafe. Nachdem wawer nisch uberwunde hei üfzstah, heiwer nisch e feini Domino’s Pizza gegönnt. Ver nisch mal wieder eppis sportlich z betätige het nisch der Dooley, öi en Oz Kolleg, z Australian Football versüecht biizbringe. Isch wirkli nu witzig und gar nit eso eifach wies üsgseht. Hei nisch emel fasch der ganz Nahmittag mit dem vertwelt. Am Abe heiwer nisch emal ufi billiger Varianta geinigt und sii deheime gebliibe, hei mal deheime es chliises Fäschtji gmacht. Isch nu witzig gsi will rächt vil Liet umcha sind gsi. So billig is de schlussendli aber gli gar nit gsi, willwer im spätere Abe gliech nu churz ine Club sii gange. Nach dem Bsüech siiwer heim und hei nu e chliini Rächnig miesse beglieche mit es paar Liet wanisch nahm Üsgang immer sind cho wecke und sind cho blöd tüe, Rache isch süss. Vam Sunntag am Morge heiwer leider mal wieder nix mitvercho will wer nisch hei miesse erhole. Ohni Verpflegig heiwer nisch de ze zwelfe ufe Wäg gmacht Richtig Gabba Cricket Stadion um iischi Heimmannschaft di Brisbane Lions ga z unerstütze. Das isch wohl der gregscht Fähler gsi. Wier hei Plätz in voller Sunna kä und isch voll miesam gsi zum lüege. Gang nie mit Hangover, ohni eppis z ässe und ohni Chopfbideckig ine AFL Match. Wier hei alli rächt glitte. Der Match isch aber super gsi, hent 140:90 gegwunne. Forza Brisbane!! Nahm Match siiwer voll begeischtret gsi und sii sofort heim sälber ga spiele. Het aber nit lang aghalte di Begeistrig sodass wer nisch meh dum chille gwidmet hei. Am Abe heiwer de öi nimme Bäum versetzt. Hei churz iischi Reis afa plane, wobi nisch der Isaac nur üsglacht het, wills vil z grossi Streckine siege. Derzüe hets nisch de nacher es Bild va Europa vergliche mit Australie gizeigt, wier reise va Schottland bis ine Irak. Shit!!

Ja dischi Wucha het scho güet agfange, sii ersch am Nahmittag in d Schüel. Nah der Schüel heiwer churz Komissione gmacht und hei nu miesse Gäld üsala ver de Van z bizahle. Di Automät sind öi nu tschügge tumm, heint schi doch nit alles in 50 Dollar Schiena üsagigä. Mit vil Bargäld bewaffnet siiwer de mal wieder ins Pub ga Pool spiele und derna Heim und de öi nahm Ässe nit z spat ga ligge.
Ja und hitu isch miene gross Tag gsi, erschtmals links Autofahre. Wier hei mit de Diitsche wieder am glieche Ort abgmacht kä und d Ubergab het erfolgriech stattgfunde. Nach dem alli Dokumänt ubergäbe sind gsi, hets de nu es chlies Abschiedsfoto gigä. Ja und de is los gange! Mit ieschum Van, öi bekannt als Shitbox die 2-te, heiwer nisch ufe Heimwäg gmacht. Isch nu rächt verwirrend gsi. Erschtens inera Grossstadt umcha z fahre und de öi nu links, isch rächt strange gsi. Z komischta isch fasch der Chreisel gsi! Wier sii de emel heil deheime acho. Puh!
Das isch de öi scho z gregscht Ereignis am hitig Tag gsi. Der räscht vam Tag siiwer bits am chille gsi und nu churz im Pub gsi. Ah genau, im Kino siiwer öi nu gsi, sii ga Indiana Jones lüege. Also het nisch nit wirkli vam Hocker grisse. Isch nu schwierig zum verstah gsi, aber gli, d Handlig isch Bullsh…!!

Jetzt isch scho spat und wier miesse more mal wieder in d Schüel! Also is das wieder emal gsi mit Spass und Tricks va Australie. See ya!!