Ab dri!

So schnäll chats ga bis wer nisch wieder mälde. Jetzt heiwer gad es herrlichs Nachtässe verspisse kocht va der Grossmüetter va der Gastfamili vam Schwiizer Kolleg va dem wahnisch mit schienem chare bis uf Cairns mit nimmt. Tehnt kompliziert, isch aber eso. Hei wieder epis erläbt hie z Australia.

Am Mäntag heiwer nisch de z erscht emal es Billet ver de Bus miesse organisiere, damit wer am Nahtag uberhöipt zrug uf Bundaberg hei chäne ga um da der Schwiizer z träfe. Das isch de gar nit eso eifach gsi, wills in dem Kaff kei gressere Busbahnhof oder eppis het kä. Aber zum Glück het epper anu düezumal z Internet erfunde. Derna heiwer nisch ufe Wäg zer Gararge gmacht um abzkläre ob mu mim Van nu eppis cha mache oder ob wirkli als verbie isch. Isch de leider nix meh gsi mit flicke. D einzig Möglichkeit nu eppis ver de Van z vercho isch gsi ne dum Besitzer va der Scooter Vermietig gsi. Da das eso en h..... Halsabschnieder isch gsi heiwer de leider öi nit eso vil vercho. Aber äbe, besser wa gar nix. Nah dem super Deal heiwernisch wieder mit de andre Schwiizer am Strand getroffe um da der letscht Tag in Agnes Water z gniesse. Hei bits am Strand ghängt und gitschuttet, isch gmietli gsi. Am Abe heinsch nisch de nu zure gmietliche Grillade iglade. Da schii scho z Ässe ubernu heint, hei de wier halt spontan es paar Pier geposchtet, nit dass schi lähr üsgähnt. Nah dum feine Ässe isch de nu epper uf di grandios Idee cho eine z schiebre. Am Afang heiwer nisch nu gedeicht moll, aber schlussendli miessewer säge, gopf chänent dii grüezini nit jasse. Erschtens siiwer z sägscht gsi, japapa, de heiwer ja mit dopplete Charte miesse spiele, japapa und de heiwer halt NUR französischi Charte kä. Ja jedefalls is de am Schluss einigermasse gange. Nach es paar Pier is de gli nu witzig gsi.

Am Ziischtag siiwer de früeh üse Fädre um iische Bus ze halbe sibne z verwitsche. Z Bundaberg de acho heiwer zersch emal iischers Gepäck miesse unerbringe. Der ganz Tag heiwer nisch de z Bundy bits vertwellt will wer ersch am Abe mim Tobias, äbe der Schwiizer, abgmacht hei. Sii bits ga shoppe, bits ga Pool spiele aber d meischti Ziet siiwer irgend eswo am umcha heiche gsi. Der Tag isch de leider nit eso schnäll verbie gange wiewer nisch erhofft hei. Nah dem interessanteschte Tag va iischem Trip bis jetzt heiwer nisch de mit dem Andre getroffe. Isch nu e gäbige Siech. Z Auto waner het isch eso en Jeep ähnliche Chare, isch nu easy. Das Pirschtli het öi alles im Auto wame brücht ver eso en Trip, isch sogar besser üsgrischtet als sus wier sii gsi. Nah dem dasswer de iischers Gepäck verfrachtet hei, sii wer de wieter zume Kolleg va im. Der wohnt binera Gastfamili und isch jetzt gad bald es Jahr scho hie. Jedefalls siewer hie üfgnu worde wie chlieni Herrgöttlini. Dii hent es riese Hüs und wier hei sogar es eigens Zimmer vercho mit eme riese Fernseh, see pics, und eme eigene Badzimmer. Nacheme chliene Nachtässe heiwer nu schnäll d Wäsch gmacht und sii de öi ga ligge.

Hitu am Morge heiwer nu der Match im Fern glüegt und de öi nit z spat üf. Hitu heiwer nu schnäll bits Campingüsrischtig köift, sprich es Zält, will z Auto z chli isch ver alli dri z ligge. Derna siiwer ane Üssichtspunkt gange wont d ganz Region chasch uberblicke. Z Mittag heiwer nisch de am Strand a gegönnt. Hei gmietli der Gasgrill ane Strand gnu und hei da gmietli es paar Steaks ubergita. Isch der Hammer gsi. Nacheme Glace siiwer wieder zrug und hei wieder es wunderbars Nachtässe ufem Tisch kä.

Sodeli das wäris emal wieder gsi va iisch Oz`s! More geits de wieter richtig Rockhampton, aber vorher lüegewer de appa nu der Match. See ya, ewe Benjamin

600 KM später, over und aus

Ich säge euw die purschte heint wieder es glick kä tletschte täg, das glöibent 3 eleinig nit. Ja am Zischtag heiwer ische super Trip gstartet…hei nisch zersch durch de Stau durch Brisbane miesse kämpfe und durch di ganze Vorerter.Z Beni isch gfahre, vili siwer eu wägs dem nit va tätsch cho… Si de darum nimme so wit cho, will ze 5 hets afa idunkle. Der erscht Stop isch in Moodooloba gsi, es chlis Kaff am Meer a. Na dem dass wer si acho heiwer es flotts Stuck Fleisch uber geta anere öffentliche BBQ Stell. Derna heiwer de es Pub gsüecht, hei de nit wirkli epis gfunne und so siwer de nit tspat ga ligge.
Am andre Morge siwer de mitsch inere Baustell erwacht, aber hei de ohni Problem chenne wägfahre. Tnegscht Destination wawer agstiret hei isch Noosa gsi, isch es schöns Dorfji aber ehner epis ver Richeri, si biz ga bummle, ga surfe und de ane Sunshine Beach ga plantsche. Und de siwer eu scho witer gfahre uf Maryborough. Da heiwer de zerschtmal ische Gasgrill gebrücht, hei nisch flott es paar Spahetti uber geta…mmh fasch wie Deheime gsi! Später nu ines Pub ga Rugby(State of Origin, jetzt isch 1:1 zwische Queensland und New South Wales) lüege und es paar Partie Billard spile und de swe int Häija!
Morge früeh üf und de siwer wieder losgedüst richtig Hervey Bay, da siwer nur schnäll durchgfahre und int tnegscht Wältstadt wawer si igitrudlet het Bundaberg gheisse, da produzierentsch da der wältbekannt Rum, wer kennt ne nit! Vo da hängiwer uf Agnes Water welle, aber ja ische Van het halt nit wirkli Luscht kä. Uf halbum Wäg heder gottlos afa komisch tene, de heiwer gedeicht, njä apa mal zer negscht Garage, aber ja 5 minüte später het Shitbox eifach nimme witerwelle und de hets kläpft, gräuchnet und weiss nit was alls leida….Eswas Teilti vam Motor heiwer eu nu verlore und ja de siwer mitsch im Urwald gsi, keis Nätz, kei Mänsch, kei Fröjie, kei Liäbi, kei….äbu, si rächt am verzwifle gsi. De heiwer halt mal miesse probiere ob nisch eper hilft, z 2. Auto het de eu scho aghalte (das chenntisch bi isch vergässe…). De sind di zwei Hächte üsgstige, eine het es Pier iner Hand kä und der andre suscht es Gsöff, sehr vertrauenswürdig. Aber schi sind hilfsbereit gsi, heint sofort Tsach int thand gnu und dum Abschleppdienscht aglitet, de hets gheisse die Purschte „sellti“ in 2h aricke. 4h später sind der Kevin und der Benjamin immer nu am warte gsi. Isch de scho 9 gsi und halt stockfischter, aber en Laschtwage het emmel nu aghalte, die heinte nu mal dum gliche Lappi aglitet und de heintsch nisch de versproche dasch nisch am negschte Morge abschleppent. Naja, mit neuer Hoffnig ga ligge, morge üf..und de isch das Spiltji wieder vo vorna losgange, warte, warte und numal warte, gat dass wer das vam Militär gegwenti si. Gägs Mittag isch immer nu niemert da gsi…churz vorum verdurschte und verhungre heiwer nisch de entschiede ztrampe bis uf Agnes Water. Diz mal is de nimme so eifach gsi, isch de glich e Stund gange bis nisch de en jungi Fröji namens Emma afa e Stuck het mitgnu..der letscht Stuck siwer de mime andre mit und de siwer endli bi der super Garage gsi, wo nisch hängi selle abschleppe. Di heint de natirli va dem nix gswisst, aber gägs sagehafti 300 Stuz heintsch de ische Chare abgschleppt. Mim Chare acho iner Garage, isch die Diagnose gsi, tShitbox brücht en neue Motor, voila. Wiener cha das chennt vorstelle isch nisch das ebiz ztir und somit heiwer afa mal vellig vil Gäld üssum Feischter gschmisse (aber zum Glick spilt ja Gäld hitzutagsch nur nu en unbeditendi Rolla in ischer Gsellschaft) und ische Trip miesswer eu umplane. Aber zerschmal zrug was wer na der erschütterndu Diagnosa gmacht hei.Hei ischi sibe Sache gepackt und si ins negscht Backpacker gezoge. Da acho heiwer de endli mal wieder chenne tusche. Isch wirkli en Tröim in dem Backpacker, vil Platz im Zimmer, geili Umgäbig und alls isch wirkli super gmachts. Und eu der Ort sälber, isch zwar gar nix los , aber hüere idyllisch und geile Strand. Richtig zum entspanne.Am mabe heiwer nisch uf der Schreck eifach mal epis miesse gönne, si ines Restaurant ga fruschtässe. 350g Rumpsteak mit Crevette, der vittlaplut Wahnsinn. Später hets nisch nu ins einzig Pub gschreckt hie mit es paar Titsche wower hie hei kenneglehrt.Am Samstag ze 10 üf und de siwer mime Titsche zu der Garage gfahre, wosch nisch de äbu verkündut heint dass das vil zvil wird choschte der Van zrepariere. Und nachher witer zu schinum Chef, dem kehrt en Töffverleih und der het nisch de gseit dass er nisch ische Van vili abchäuft ver es paar Hundert Stutz (wenigschtens das). Am Namittag nu biz ane Strand ga bädele und ga tschuttele. Und am mabe heiwer nu ischers Surfbrett eme Titsche chenne verchäufe ver 170 Stuz.Am Sunntig heiwer en 1 Tages Trip uf tLady Musgrave gmacht,das isch en naheglägini winzigchleini Insla. Siwer zersch fascht 2 Stunde mim Böttli verüs gfahre. Isch vellig en Wällegang gsi und de het das Chotzgelage agfange. Vor isch het en 5 chöpfigi Famili ghockt, da het jede kotzt üsser der Vater und eu suscht heint schi es paar alles numal durch de Chopf la ga. Schöni Atemosaphera gsi! Da acho siwer de zersch biz ga schnorchle. Um di Insla rumherum hets es hüere Riff. Nachher Tinsla ga besichtige, ässe und wieder ga schnorchle. Hei sogar es paar Schildchrote gseh und der Nemo. Alo isch vellig idrücklich gsi.Am mabe häni es Sms vercho vare Schwizeri, wo eu zBrisbane iner Schüel isch gsi, Afa mal sige schi mit es paar andre am gliche Ort wie wier und 2. Heige schi swo annersch en Schwizer getroffe, der het eu es Auto und süeche nu Mitfahrer. De häni dem mal aglite und jetz träffe wer nisch more zBundaberg und fahre de mit ihm witer ver uf Cairns. Spare wer vil Gäld und ja isch intressanter wa mim Bus zreise….mal wieder es biz Gick kä.Ja und an dem Abe siwer nu mit de andre Schwizer nu e Sprung ins Pub. Jetz heiwer Sunntag und si froh dass tSchwizer doch nu swas gegwunne heint und entsetzt dass di hüere Türke sind witer cho,hüere Ärger. Später gäwer nu zu dum eintu vam Töffverleih und hoffe dass ver nu biz money verchäme ver ischi Schlätterchischta…Ich hoffe ischi Glückssträhna fäge jetz a und ier miesset kei unerfreulichi Nachrichte vo isch läse;-)Bis zum negschte mal, see ya

Das Warten hat ein Ende

So jetzt siewer nu es letschts mal in ieschum Guesthouse und sii scho agspannt ver iische wieter Trip. Jetzt heissts nu es letschts mal eso richtig eine ga topfe und de ab dri!
D letschte paar Täg hie z Brisi heiwer nu mal so richtig gegnosse.

Am Frietag siewer de nu es letschts mal in d Schüel gange, wower de öi iischers grandios Zertifikat vercho hei. Dasswer nisch nit uberta hei, siewer ze elfe mit der ganz Klass nu es Abschiedskäffeeli ga trieche. Am Nahmittag de nu e Stund in d Schüel und nah dem heiwer nisch dum tränerieche Abschied gstellt. Am Abe heiwer nu es chlies BBQ mit es paar Japsini kä, isch nu luschtig gsi. Nacheme churze Kasino Gang heiwer der Abe mit es paar Pierlini ime Pub abgrundet.

Am Samstag heiwer nisch de mit es paar alt bekannte üsum Wallis getroffe. Z Weissi und z Luki sind gad per Züefall öi iner Stadt umcha gsi. Sii gmietli zäme eppis ga trieche und hei de aschliessend nu es BBQ bi isch verastaltet. Nach dem gedigenu Nachtässe siiwer nit z spat in Stadt ver nisch e güete Platz z sicher ver de Match z lüege. Nach es paar Pierlini is de endli losgange. Wier hei rächt mitgfiebret und hei d Schwiizer agfiieret, aber hent nisch apa nit khert. Sind nu rächt vil Schwiizer gsi, de is nu witzig gsi. Der Portugal Match heiwer öi nu mitvercho und sii de afa ze sibne am morge deheim gsi.

Am Sunntag heiwer de ersch emal miesse üsschlafe und derna is hiner z packe gange. I hate it! Derna siiwer de mal wieder ind Stadt ver d Match mitzverfolge, z Weissi und z Luki sind öi wieder mit va der Partie gsi. Nachera bittera Niederlag vam Federer heinsch nisch de üsum Pub getriebe und hei de halt vorna ime andere Pub miesse ga d Füessballmatch lüege. D Östriecher sind ja gar nit eso schlächt. Da hets de leider öi kei Pier meh gä und de heiwer d Match ohni miesse mitverfolge. Das geit doch uf kei Chüehüt! Der Match va de Dietsche heiwer leider öi nu gseh. De heiwer nisch de wieder ze sibne zum Van gschleppt und hei flott üsgschlafe.

Geschter heiwer nisch scho am Nahmittag mit dum Weissi und Luki getroffe und hei zäme ime Pub, Steakhouse, emal wieder e flotte Schieber gjasst. Das isch es tröimli gsi mal wieder mit eme Doppelspiel chäne z jasse. Hei de bis ze niene Chartespieli gspielt und derna heiwer de langsam Hunger kä. Willsch de aber genau ze niene bim Steakhouse d Chuchi gschlosse heint, heiwer de mal wieder ine Subway miesse ga. Derna heiwer nisch getrennt um es paar Stunde ga z ligge und derna de wieder z träffe ver em morge früeh der Holland-Italie Match z lüege. Z Kegi und ich hei de emel nimme üf mäge, het mi gad fasch bits hert. Hängis gäre gse.

Ja hitu heiwer nime gross gleischtet. Sii nu es letschts mal in d Stadt ver eppis chlies z ässe und nisch va de andre Walliser z verabschiede.

Ja ich wellti mich hie an der Stell offiziell va Brisbane abmälde! Wier mächenisch auf den langersehnten Trip durch Australia. Wier wärdenisch so bald wie meglich wieder mälde.

See ya und gniesset di Ziet, also wier wärdes!!

A Hirsch

So, der Kevin tarf mal wieder epis verzelle. Ine letschte 8 Täg isch wieder vellig epis passiert, unglaublichi Sache säg Ich euw, ier wärdets gar nit glöibe. Wird cha vam Hocker risse…

Äbe ja fäwer doch am beschte mal mit dum letschte Mittwoch a: An dem Tag siwer zerscht mal ines Suschi Restaurant. Hei der Claes begleitet (Sweden Guy), da wer scho deheime hei gässe, heiwer dizmal numme züeglüegt. 14 Fr. müesch zahle und de chasch so vil ässe wient willt. Der Claes het de eu vellig igibige und wier hei nisch de vorgnu es tagsch de eu mal Suschi zässe. Am mabe siwer mal wieder ins casino, Ich hä 150 fr. gwunne und ja, Zbeni nitJ! Zerschmal iner Gschicht siwer nit ins Downunder, will wer gottlos hängi miesse astah.
Am Donnschtag siwer mim Wan ine Garage ver ne vorzfiehre, isch de leider nit durchcho, aber nur wägs Chleinigkeite. isch halt alles numme Gäldmacherie, isch alles rächt beschisse greglut hie. Ver Tregischtration müesch ne äbe vorfiehre obwohl tvordre Besitzer dass scho mal im Februar gmacht heint aber äbu ime andre Staat, in Victoria und jetz chasch da äbu nit eifach der Name wägsle, ver das brüchtiwer äbe en adräss in Victoria. Und so regischtriere wer ne halt hie, müesch halt wieder zahle. Isch miehsam jede Staat het ganz andri Regle, aber wird scho funktionagle bis zletscht…der ganz Namittag heiwer nisch de ab dem vellig üfgregt bis de dum Isaac afa isch zi cho dass är en Freund het wo Mechaniker isch..So wies üsgseht wird das jetz alles tiptop klappe mit der Regischtration und wier chenne endli uf Reise negscht Wucha, juhuuu…
Ja und nam Donnschtag isch de der Fritag cho. Am mabe heiwer zerscht big Party in Adalong kä und später bin ich und es paar ins downunder und zbeni isch mime andre Schwizer int Mustang Bar iner Valley, da isch Studänte Pary va ischer Schüel gsi. An dem Abe heiwer mal wieder es paar schöni Wuche erläbt und si de eu nit so früeh bzw. schpat ins näscht!
Der Samstag durch isch de e biz Hangover agseit gsi und am mabe endli mal wieder BBQ. Endli mal wieder es richtigs, dicks, saftigs Steak zwische die Bissera vercho, isch der vittlaplutt Wahnsinn gsi…Der drüffolgend Üsgang isch de nimme so üsschweifend üsgfalle, gmietli ines Irish Pub ighockt.
Am Sunntag heiwer nisch de ins Suschi Restaurant gwagt. Isch de eu gar nit mal so hüere schlächt gsi wiewer gedeicht hei, heis nu gäre kä. Aber eismal isch güet und de heschus ver e schutzi gsehs…Mit vollum Büch siwer de an dem Abe nu ga Füessball Match lüege, Australie gägs Iraq (1:0). Zniveau isch zwar nit so hoch gsi, aber tstimmig isch afa biz besser gsi als ime rugby oder afl match und Tstadion isch üsverchäuft gsi. Na dem mitrissundu Game hets nisch nu ins Kino verschlage, Iron Man ga lüege, isch nit schlächt gsi.Vil besser wa der Indiana Jones, vo dem Film bini scho vellig endtüschte…

Vo Sunntag bis Mäntäg heiwer grotteschlächts Wätter kä, zituwis sinflüetartige Räge, no nie so epis gseh. Ja und wägs dem hüere räge siwer de am Mäntag nit int Schüel, isch nisch znass gsi..Da das der letscht Tag vam Ivo(Swiss Guy) und dum Claes isch gsi, heiwer de am mabe nu chleini Abschiedsparty kä.. Züefälligerwis heint die zwei genau der glich Fleiger kä am Zischtag, Twält isch so chlei…Am Zischtag int Schüel, derna ga schoppe und am mabe siwer ines Pub ga pokre, jedi wucha heintsch am Zischtag und am Fritag Turnieri. Chasch gratis ga mitspile. Durch das siwer jetz Member bi der Australian Poker league, nit schlächt häh..:-)!
Am Mittwoch heiwer nisch en Jumpstarter käuft, da wer am zischtag der Wan nit zum läufe gibrunge hei, super Teil das, funktioniert wunerbar. Vili isch der ganz Räge biz Zproblem gsi, die Chäre sind eifach nit gmachti ver sottigs Wätter. Ja und de halt am mabe wie chas eu annersch si ins Downunder. Hei vellig eine durchgigä, will isch ja ische letscht Mittwoch im Downunder gsi..Zbeni isch so ze 3 Heim und ich bi de afa ze 7 mal swe in Adalong acho.. Stunde und Stunde miesse heim läufe.. äbe ja weni heim bi cho isch zbeni ufer couch am penne gsi da ich gwenli der Schlussel mithä..isch luschtig gsi will ab de halbe 7 gähnt tmeischte ga früehstuckeJ Hitte der Tag durch isch nimme vil passiert, Pizza pstellt und fernseh glüegt.

Wasi nu vergässe hä, si nit emal terschte gsi wo im Wan gschlafe heint, Sunntag bis Zischtag het der Claes in ischer Shitbox residiert, will er üssum Zimmer het miesse üszieh,är het emmel gmeint si rächt confortable und mu schlafe tiptop. Jetz heiwer nu more Schüel und de chennwer de endli negscht Wucha uf reise.. Tschüel isch nimme so intressant, Tstadt heiwer eu langsam gsehs und ja hie in Adalong sind mer biz zvil Titschi. Momentan sind apa 17 va dem Gschwader hie.. Ja nu, chasch nit immer gwinne! So das is wieder mal gsi, vili giz churz bevor wer gä numal e Bricht, will warschinli chämewer nachher de nimme so derzüe…

PS. Schribet nisch uf ischi australische Nummer, isch gäbiger ver isch.

Lets talk about iischi letscht wucha

So äs isch wieder emal eso wiet, d fühle Säck üs Australie mäldend schi wieder emal. Juhui! Obwohl eso fühl siewer gar nit, iisch chunt eifach immer eppis derzwische, öi wenns „nur“ es Pier isch.
Äbe, was heiwer d letscht Wucha als eso erläbt. Isch im Fall nu schwierig alles mäge z bhalte. Wier hei immer Krisesitzig, ver z bespräche waswer scho wieder als eso erläbt hei, bevor dass eine mim Text schriebe afaht. Langsam siewer aber bits ime fixe Tagesablöif dri, so dass nimme so schwierig isch. Aber es wird bald emal Ziet eppis nöis z erläbe.

Zu dem alltägliche Ablöif khert öi der Pub Bsüech wa de z Kegi am letschte Mäntag, nah dem dass der vorder Text gschriebe het, uf schich het gnu. Ich hä bits schlächts Gwisse kä vam Weekend här und hä de mal wieder eppis ver di Gsundheit gita und bi es bits ga jogge. Hä de aber rächt schnäll z Gwisse berüehigt kä und bi darum de wieder rächt schnäll zrug gsi.
Am Ziischtag siewer de richtig froh gsi we d Schüel verbie isch gsi und wer Heim hiner d Wäsch hei chäne ga. Nit daswer zu richtige Hüsmänner avanciert wäri, aber siet der Wucha heiwer e Schwie längwieligi Lehreri. Dii Fröi behandelt nisch wie chliini Chinder und iisch voll z Kontrollfreak, dii vorher isch vill easier gsi. Nah der Wäsch siiwer de wieder emal ins Pub bits ga Billiard spiele. Später heiwer nisch de nu ines anders Pub gitruwt, hets aber leider kei Pool Tisch. Dafer hensch es luschtigs Quiz namens Trivia, want chasch gratis Rundine gwinne. Wier sii de leider z spat gsi ver da mitzmache, hei de aber es paar Australierinne gholfe, oder sus emel versüecht.
Der Mittwoch, ja was solli säge, mal wieder Down Under. Vor dem heiwer aber nu eis va de emotionalvollschte Matchs ufer Wält chäne mitverfolge. Schii sägent emel äs siige z emotionalvollschta. Scho während der Schüel heiwer uber das Ereignis gredet und öi d Iheimische va hie dum Guesthouse hent nisch gwarnt, ja nit blaus Gwand azlegge. Äbe müess apa nu erkläre was das ufschich het. Der Match heisst State of Origin und isch e Match wa Spieler stammend üs New South Wales(blaus Dress) gäge Spielera üs Queensland(rots Dress) spielent. Isch nu e rächt patriotische Hinergrund wa d Spielera nur um die Ehre spielunt, ver irusch „State“. Der wa va 3 Spieli am meischte gwinnt chaschi appa es Balli ga hole J, nei seich, gwinnt irgend eso en Pokal oder eppis. Jedefalls hent de d falsche gegwunne, New South Wales. Voller Fruscht siewer de erscht später ins Down Under und hei de d Niederlag emel rächt schnäll vergässe kä. Z Fäschtji isch nu rächt witzig gsi und ich bi de emal fröhlich nit z spat heim. Summi heint die Nacht durchgmacht, mu weiss nit wo, gäll Kegi, nur ver z lüege wie Manchester United Champions League Sieger wird. Ich häs leider verpasst, bi z fühl gsi.
Aber!! Am Donnschtag siewer gli in d Schüel. Sumi zwar bits weniger lang wa der andre. Z Kegi isch z Mittag scho heim, chas nit verstah. An dem Tag heiwer nime gad wältbiwegendi Sache gleischtet. Sii aber de gli nit gad früeh ins Näscht, sii eifach nit miedi gsi. Iisch bringsch scho nit nider.
Frietag heiwer de iische langersehnti Termin kä ver z Auto z besichtige. Hei durch das leider d Schüel verpasst. Wier hei zer Hilf nu iische australisch Kolleg mitgnu, isch aber nit nehtig gsi, will nisch Diitschi der Chare verchöift hent. Gopf!! Diitschi hets ja nu meh wa Schwiizer! Wier hei nisch diräkt verliebt! Nachera chliene Spritztour siiwer nisch sicher gsi, das is unser Baby! In dem Momänt heiwer nu nit gwisst, dass es eso miesam isch en Registrierig vam andre State lah umzschriebe. Jedefalls, wier hei es Auto. Ubergabe Zietpunkt heiwer nisch uf hitu geinigt, Ziischtag. Güetglühnt siewer de heim eppis ga ässe und am Nahmittag in d Stadt. Iner Stadt siiwer zum züeständige Amt fer Transport gange ver das genau z kläre wäge Plagga lah umschriebe und Registrierig. Hey sind dii kompliziert. Schii akzeptiere kei Registrierig va Victoria. Äs isch eis Land, aber uberall heinsch andri Regle, jedefalls heiwer evt. e Lesig, susch miessewer di ganz Registrierig numal mache. Nach dem Ärger heiwernisch wieder e bits miesse abregu und sii de jedefalls am Abe bits ine Üsgang. Sii mal wieder ins Kasino gsi. Der Abe isch nit im Zeiche vam Glick gsi, niemer het gegwunne. Iische australisch Kolleg, der Isaac, het zimli vil verspielt, appa uber 600 Dollar. Aber wier sii nit eso spendabel gsi. Ze 12-e isch de z Kegi und der Isaac scho heim. Ich bi mit eme andre Schwiizer nu es Hüs wieter. Paar Kollege hent versüecht Karaoke z singe, isch nu gar nit emal eso hüere güet gsi. Später siiwer de richtig Heim und da heiwer de z Kegi iner Couch schlafent üfgfunde. Nahm Üsgang vesüeche en Film z lüege isch nu nie güet cho.

Samstag heiwer mal wieder fasch nit üse Fädre mäge. Isch so schön üszschlafe. Nachdem wawer nisch uberwunde hei üfzstah, heiwer nisch e feini Domino’s Pizza gegönnt. Ver nisch mal wieder eppis sportlich z betätige het nisch der Dooley, öi en Oz Kolleg, z Australian Football versüecht biizbringe. Isch wirkli nu witzig und gar nit eso eifach wies üsgseht. Hei nisch emel fasch der ganz Nahmittag mit dem vertwelt. Am Abe heiwer nisch emal ufi billiger Varianta geinigt und sii deheime gebliibe, hei mal deheime es chliises Fäschtji gmacht. Isch nu witzig gsi will rächt vil Liet umcha sind gsi. So billig is de schlussendli aber gli gar nit gsi, willwer im spätere Abe gliech nu churz ine Club sii gange. Nach dem Bsüech siiwer heim und hei nu e chliini Rächnig miesse beglieche mit es paar Liet wanisch nahm Üsgang immer sind cho wecke und sind cho blöd tüe, Rache isch süss. Vam Sunntag am Morge heiwer leider mal wieder nix mitvercho will wer nisch hei miesse erhole. Ohni Verpflegig heiwer nisch de ze zwelfe ufe Wäg gmacht Richtig Gabba Cricket Stadion um iischi Heimmannschaft di Brisbane Lions ga z unerstütze. Das isch wohl der gregscht Fähler gsi. Wier hei Plätz in voller Sunna kä und isch voll miesam gsi zum lüege. Gang nie mit Hangover, ohni eppis z ässe und ohni Chopfbideckig ine AFL Match. Wier hei alli rächt glitte. Der Match isch aber super gsi, hent 140:90 gegwunne. Forza Brisbane!! Nahm Match siiwer voll begeischtret gsi und sii sofort heim sälber ga spiele. Het aber nit lang aghalte di Begeistrig sodass wer nisch meh dum chille gwidmet hei. Am Abe heiwer de öi nimme Bäum versetzt. Hei churz iischi Reis afa plane, wobi nisch der Isaac nur üsglacht het, wills vil z grossi Streckine siege. Derzüe hets nisch de nacher es Bild va Europa vergliche mit Australie gizeigt, wier reise va Schottland bis ine Irak. Shit!!

Ja dischi Wucha het scho güet agfange, sii ersch am Nahmittag in d Schüel. Nah der Schüel heiwer churz Komissione gmacht und hei nu miesse Gäld üsala ver de Van z bizahle. Di Automät sind öi nu tschügge tumm, heint schi doch nit alles in 50 Dollar Schiena üsagigä. Mit vil Bargäld bewaffnet siiwer de mal wieder ins Pub ga Pool spiele und derna Heim und de öi nahm Ässe nit z spat ga ligge.
Ja und hitu isch miene gross Tag gsi, erschtmals links Autofahre. Wier hei mit de Diitsche wieder am glieche Ort abgmacht kä und d Ubergab het erfolgriech stattgfunde. Nach dem alli Dokumänt ubergäbe sind gsi, hets de nu es chlies Abschiedsfoto gigä. Ja und de is los gange! Mit ieschum Van, öi bekannt als Shitbox die 2-te, heiwer nisch ufe Heimwäg gmacht. Isch nu rächt verwirrend gsi. Erschtens inera Grossstadt umcha z fahre und de öi nu links, isch rächt strange gsi. Z komischta isch fasch der Chreisel gsi! Wier sii de emel heil deheime acho. Puh!
Das isch de öi scho z gregscht Ereignis am hitig Tag gsi. Der räscht vam Tag siiwer bits am chille gsi und nu churz im Pub gsi. Ah genau, im Kino siiwer öi nu gsi, sii ga Indiana Jones lüege. Also het nisch nit wirkli vam Hocker grisse. Isch nu schwierig zum verstah gsi, aber gli, d Handlig isch Bullsh…!!

Jetzt isch scho spat und wier miesse more mal wieder in d Schüel! Also is das wieder emal gsi mit Spass und Tricks va Australie. See ya!!

Güeti Gschicht…

So liebe Freunde der Blasmusik, Ich hä endli mal wieder zit gfunne fer eswas zschribe. Hei tagtäglich e hüere Stress, miesse vo einum Termin zum andre hetzeJ!

Tletschte 10 Täg sind ganz im Zeiche vam Glücksspil, Üsgang und Auto süeche gstanne. Summs isch erfolgrich gsi summs halt weniger…. Vorletscht fritag siwer na der schüel gmietli ine Park ga grilliere mit 3 andre Schwizer und am mabe heiwer nisch de ischer 3. Neu lideschaft (nam rugby und der AFL) higigä… dum Glücksspil! Voll motiviert und siegessicher siwer de ins Casino…nach e paar Pier und es paar Rundine Blackjack, hän ich de mine Gäldsack um 70 fr. chenne berichre, zbeni het glöibi um di 30 fr verzockt. Nach dem Gäldsäge siwer de nu gmietli ins down under!

Am Samstag isch de mal wieder Üsschlafe agseit gsi. Am abe heintsch de hie iner nechi swas fäscht kä. Nichtsahnend siwer de ines Pierzält i, de hets mi fascht ufe rigg gleit.4 Göicha iner Volkstracht heint probiert Titschi Lieder zsinge. e wahri Freid gsi! Da is nisch de nit tspat verleidet, znegscht zil isch de The valley gsi, isch so es Viertel voll Pubs und Clubs! Si in 2,3 bare i gsi, isch aber nit wirkli vil los gsi und het nisch eu nit so gfalle (warschinli siwer eifach int falsche Lokäler i). Darum heiwer nit tspat es taxi ver heim gnu. Am Sunntag Namittag siwer de mal wieder ga rugby lüege, dizmal het ischi heimmannschaft vellig ufe grind vercho, aber isch gli intressant gsi…

Am mäntag heiwer vellig en Strecki zruggleit, hei alli Backpackers abgeklappert und si uf Aschlagbrätter ga lüege obs apa es paar intressanti Agebot ver Autos het, hei de emmel es paar gfunne. Di Telefonat sind nachher nit so erfolgrich gsi, entweder sind tauto verchäuft oder scho wieder wäg gsi oder niemert het abgnu.
Am Zischtag heiwer t everys psüecht, dasch e famili wo t chastonay isabel, zwältschi und der Bräu scho gwohnt heint..Zcarli und Zpäddi sind da eu scho verbi gsi. Isch de emmel rächt witzig gsi, hei rächt intressanti sache vo der Isa kehrt, Schi hei schins fasch jede tag en wifläscha geputzt mit ere Kolegin. Was nisch eu verzellt het, isch dass der Bräu und zwältschi schich gäre alls fröjie tient verchleideJ…sehr intressant!
Schi het nisch de prompt zum Znacht ver am Samstag iglade, was der aber leider int zWasser isch kit,will schi kei zit heint kä..aber si de negscht wucha swe iglades!

Suscht isch nit vil ratschigs passiert twucha durch, fasch jede abe ine üsgang, fescht englisch glehrt, am Donnschtag mal wieder ins Kino (Nie wieder Sex mit der Ex, rächt witzig..) und am Fritag heiwer mal wieder es BBQ mit der Schüel kä, der ganz Morge.
Am Namittag nu es stündli int schüel, nacher gmietli ine Park es Pierli ga triche und de am Mabe mal wieder ins Casino. Hei de eu beidi vellig epis abgrümt und si de nachher int valley mit es paar andre Schwizer, wower de alls wieder üsgigä hei. Dizmal isch hüere güet gsi, heis rächt luschtig kä. Ze 5-e isch de eper uf di genial Idee cho numal ins Casino zga. Das isch de nit wirkli güet cho und ja ze 7 apa im näscht gsi.
Am Samstag heiwer lang gschlafe bis am Namittag eswe, am mabe de zerscht ins Kino (21) und wie chas eu annersch si ins Casino, eu dizmal is nit wirki erfolgrich verlufe ver isch zwei Hibsche. Der Abe heiwer de gmielti im Down under la üsklinge.
Sunntag de mal wieder früeh üf, so ze 1-e, getuscht, Pizza igschmisse, twäsch gmacht, gechillt der Namittag dur und de heiwer nisch gedeicht, dass wer das hüere Gäld wieder miesse ga zruggwinne. Das het de wunerbar geklappt, Ich hä 340 stuz, der Isaac fasch 500 hebel und Zbeni…ähhh… gegwunne. Nachher siwer gmietli ines Pub und nisch endli mal wieder es richtig geils Stuck Fleisch gegunnt!! Nach es paar Rundine Billard siwer de heim.

Hitte siwer int schüel und nachher ine Travel Agency wos es paar Auto üsgschrbe het kä…Eis Telefonat isch erfolgrich gsi, dass heisst am Fritag heiwer es Träffe mit einum. Mal lüege was üssa chunnt, gseht aber güet üs!
So jetz heider wieder epis zläse, Ich mag nümm und mälde mi ab. See ya

Dank sei Public Holiday

Sodeli, jetzt chumi emal wieder derzüe eppis z schriebe! Dischi Wucha siiwer fasch immer eppis am tüe gsi, so dassis öi vergässe hä oder äbe nit derzüe bi cho. Daher gits jetzt zimli vil z verzelle und ich bi eigentli z mieds zum schriebe.
So im vorherein z säge isch: wau, hei wier es geils Weekend erläbt. (Siehe Bilder)

Nach dem wunderschöne Spaziergangi im Roma Park vam Ziischtag am Abe, siewer am morge früeh üf ver de Match z lüege und hei nisch derna wieder ufe Wäg in d Schüel gmacht. D Schüel isch es bitseli borring gsi, aber heisus emel güet uberstande. Bevor wer nisch de um di Biigetta Wäsch gekümmret hei, also wier zöggresus gäre üsa wenns um d Wäsch geit, siewer nu schnäll paar Sache ga erledige. Sprich, sii nu der geil Trip nach Moreton Island, wawer am Wuchenend si gsi, ga büeche und sii de öi nu ga Billet chöife ver de WM 2010 Quali-Match Australie gäge de Irak wa de am 1. Juni hie z Brisbane stattfindet.
Bim Büeche vam Trip heiwer ens schwein kä. Wier hei nisch voll spontan, wie wer halt öi sii, am Mittwoch ersch entschlosse da z ga und de heiwer nu gad genau di letschte Pläz chäne ergattre. Het zwar 280 Dollar koschtet, aber het schi wirkli glohnt.
Derna siewer zum Ticketek, wie bi isch der Ticketcorner, gange um äbe die Billet nu z poschte. Gopf isch das e miesame Typ am Schalter gsi. Bis de wier dii Ticket endli kä hei, während der Ziet hängi mu locker 2 Fiirabe Pier chäne trieche. Schlussendli heiwer schi de aber doch nu vercho.
Endli „Deheime“ acho, heiwer nisch de um iischers nöii Hobby gekümmret, z Wäsche. Ich weiss ja nit, aber git ja nix längwieligers als das. Aber wemu mit der Vorfreid ufe Üsgange derhiner geit, uberläbt me öi das. Jedefalls siewer wie jede Mittwoch, voller Entschlosseheit am negschte Morge gli nu in d Schüel z ga, ins Down Under gange. Der Abe isch schnäll verzellt, PAU! Spätestens nah dem Üsgang siewer richtig hie z Australie acho.

Und scho siewer am negschte Morge erwacht. Morge? Ich hei 2-mal uf d Ühr miesse lüege, äs isch leider scho Nahmittag ze 2-e gsi und de hets nisch knapp nit glängt ver in d Schüel. Dadurch heiwer an dem Tag nimme gad vil grandioses gleischtet. Hei bits Hangover kä und sii nur churz in d Stadt gange um eppis chliis ga z ässe. Am Abe heiwer nisch gmietli vor de Fernseh gschmisse und hei es paar Serie glüegt. Sehr beliebt hie isch American Dad, South Park und natirli Simpsons. AH, natirli heiwer öi nu ver di astehend Prüfig glehrt.

Am Friitag het nisch iischers erscht BBQ in Australie erwartet. Aber vor dem isch äbe, wie gseit, e chliini Prüfig agseit gsi. Wier hei natirli wieder emal grockt, nei seich, isch aber nu güet üsgfalle. Aschliessend an die Prüfig heiwer nisch ufe Wäg gmacht zum Roma Park wower iischers erschti BBQ gmeinsam mit der Klass hei därfe gniesse. Mit BBQ-Sossa und was öi nit z verachte isch gsi, isch z bier derzüe!
Das Ässe het stattgfunde will 4 Schieler d letscht Wucha in iischer Klass sind gsi.
Aber wirkli chäne gniesse heiwers nit. Gib eifach nie eme Japaner oder Koreaner e Kamera in d Hand während eme BBQ ver Abschiedsfoto z mache. Hei, eis Foto isch ja iner Ordnig, aber es we wellti de öi nu z Fleisch gniesse.
Am Nahmittag heiwer de leider wieder in d Schüel miesse. Derna is de aber wieder wietergange mit Abschied näh, üs einem Abschiedstrunk sind de schnäll mal 2-3 worde. Zu allem Uberfluss heiwer de nu wieder emal en nöii Liedeschaft entdeckt, z Salsa tanze. Wier hei natirli andersch dominiert mit iischem Tanzgfühl. Ja e Schluck Latino-Blüet wäri sie äbe doch nit eso schlächt. Isch aber nu cool, schii hent mitsch iner Stadt e Müsigalag installiert und de chasch da bits ga abdance. Also ver d Afänger hensch nu en Lehrer agstellt wa da bits vortanzt, wier sii leider z spat cho.
Der Tag isch zimli schnäll verbii gange und so heiwer nisch de doch nu uf de Heimwäg gmacht und nit z spat Noni ga mache.

Voller Nöigier siewer am Samstag am morge früeh üf, dass wer ja nit z spat chäme ver de Trip. Ze Sibne het de iische Trip bim Transit Center agfange. Hei wenn ich dii Chäre gseh hä, häni fasch Schiss kä da izstiege. Iisch sindsch so mit 2 eltere Auto, Gländegängigi 10-Plätzer, cho abhole. Jedefalls heiwer nisch de getruwt, aber de het scho z negsch Problem agfange. Wier sii nur e Schwiizer Gruppa gsi und leider sind öi Fröie da gsi. Gopf, dii hent während der ganz Fahrt keis Müll gstellt und das am Morge früeh, das het ja afa güet agfange. Mit der Fähra is de wiiter zer Insla gange, sii appa eso e Stund gfahre. Änina de endli acho, het nisch es Paradis erwartet, also isch wirkli es Tröimli gsi. Wiet und breit nur geile Strand, geils Meer, kei richtigi Strasse, wenig Touriste, Delfina!!
Zerschta wawer de gmacht hei, isch z Camp bezieh gsi. Also in mier sind so Gfühli hoch cho, als wäri im Jungwachtslager, üsser dass uberall Sand isch gsi.
Ver das wer eso richtig z Feriefieber hei vercho, siewer derna zersch afa emal ani Blue Laguna bits ga bädele und bits ga Beach Soccer spiele. Isch es wunderschöns Seeli mitsch iner Insla gsi. De is mit dem Cheep quer durch d Insla uf d ander Sieta gange, wower nisch de hei chäne verpflege. Scho nur d Fahrt quer durch d Insla isch es Erläbnis gsi. Uberall Wurzle und Hubbla mitsch ufer Strass, wettigs hüere gwaggler Wärch in dem Chare. Also Nahtag wäri da nit eso va Vorteil. Aschliessend heiwer e chliini Klippa bestiege und sii ga en Lüchtturm bestühne. Scho nur d Üssicht uf di ganz Insla isch der Hammer gsi. De hets de wieder Istiige in das lustige Mobil gheisse und sii wieder quer durch d Insla richtig Camp gfahre. Nacheme chliene Stopp im Bottle Shop siewer zrug zum Camp gange. Da heiwer de gmietli am Strand der Sunneunergang chäne bestühne und hei sogar es paar Delfina gseh. Nach es paar Pierlini siiwer de öi nit z spat ins Näscht.

Zerschta wawer am Sunntag morge gmacht hei, isch mal eso richtig feini Pen Cakes ässe gsi. Nahm Frühstück siewer ufem Meer ga Kayak fahre und hei jenschti Fischa gseh und Wracks fa alte Schiffi. Isch nu amüsant gsi. Z Mittag hets de Magic Hot-Dogs gigä. Das heisst: es Wienerli, 2 Toastschnitte, bits Salat, Chäs und Sosse. J Ich weiss ja nit, aber wier hei scho bits meh erwartet, wes scho heisst MAGIC! Jedefall siewer de derna ini sogenannti Wieschti gange und hei de en nöii, cooli Sportart entdeckt. Z Sandboarde. Da liggesch chopfora ufera Spannplatta und rutschusch eso en Sandhill ebri. Also isch ja scho nu witzig, aber eso ohni Lift oder nur scho Stäga, verleiduts der nu rächt schnäll. Jedesmal der Hubbel ebrüf z tschalppe isch sogar ver iisch durchtrennierte Sportler e Chrampf gsi. So nach dum Motto, zuerst die Arbeit(Hubbel ebrüf löife) dann das Vergnügen(Party) siewer de zug zum Camp. An dem Abe heiwer wieder es paar Delfina gseh. Dits mal siewer aber ins Wasser gange und de sindsch uf iisch züe gschwumme. Appa eso 5 Meter vor iisch hensch schi umkhert und sind gange. Isch nu es komischus Gfühl we e wilde Delfin uf dich züe schwimmt. Wier heis emel uberläbt und z Fäscht derna isch öi witzig gsi.

Am Mäntag hängiwer ja eigentli Schüel, kei Angscht wier hei nit gschwänst, aber da Public Holiday isch gsi, heiwer e 3-tägige Trip ufer Insla chäne gniesse. De heiwer der ganz Tag nimme eso vil gmacht. Am Morge siewer schnäll ufe hechscht Sandhubbel, mit era stolze Hechi va 200-300 Meter uber Meer, va der Wält. Der Räscht vam Tag siewer bits am Strand am chille, schwimme, tschutte gsi. Isch so e richtigi Gniessertag gsi. Ze 5-e siewer de leider wieder mit der Fähre zrug Richtig Brisbane gfahre. Aber dii Insla isch wirkli der Hammer gsi. Schlussendli siewer de gli froh gsi wieder „Deheime“ z si und mal wieder richtig chäne ga tusche. Hei dii Pirschtlini hent es strengs Grüchli kä. Voll ausgepumpt siewer de nit z spat uner gsi.

Der Alltag het de am Ziischtag ersch wieder agfange. Da isch eigentli nit vil passiert. Hei nisch ver en Besichtigung va der Pier Brauerie igschriebe, wird sicher nu interessant. Nah der Schüel siewer nu schnäll bits ga shoppe und de eigentli nit z spat hei. Zu allem Uberfluss bini an dem Abe nu ga jogge. Z kegi der fühl Hund isch lieber vor dum Fernseh gebliebe.

De isch da wieder emal der berühmt berüchtigt Mittwoch vor der Tiri gsi. Ja d Schüel isch de zum Glück schnäll verbii gange, sodass wer nisch nacher nachenand ufe Wäg zum DFO üsserhalb va Brisbane gmacht hei. DFO isch eso es etwa 30 Läde beinhaltends Gebäude wo alles rächt billiger isch. So z säge es Outlet Gschäft. Wier sii ersch so ze 3-e da gsi und de we wer gad durch si gsi hensch züe gita. Also isch scho nu rächt gross. Zum Glück heiwer kei Fröi derbi kä, susch hängiwer wahrschinli nu z Zält miesse mitnä ver z ubernachte.
Wier heinisch de emel mit nöiem Chram ufe Wäg zrug zum Guesthouse gmacht. Da heiwer nisch schnäll verpflegt und sii de wieder emal ine Üsgang und zwar wieder mim glieche Ziel wie immer, pünktlich am Nahtag in d Schüel z ga. Im Üsgang heiwer nu der Geburtstag va einera, wa öi hie im Guesthouse isch, gfiehret, sodass de summi nah de 12 Heim sind (Kegi) und summi da halt bits später.

Jedefalls heiwer hitu emal üfmege, oder besser gseit, hei der Wecker mal wieder gstellt kä. Der Schüeltag isch nu easy gsi, halt bits mieds aber was willt. Nah der Schüel siewer nu ga Billet chöife ver Rugby Match vam Sunntag und derna de nit z spat heim. D Wäsch heiwer (merci Kegi) sogar öi nu gmacht Jetzt vorher siewer nu schnäll ines Pub mit Billard Tischa eine ga zieh und derna heiwer der Abe mit eme Kinobsüech la üsklinge. Si ga „What happens in Vegas“ lüege, also emel das wani verstande hä isch nu witzig gsi.

PS: versüeche bits fliessiger z schriebe!

See you!